Ia mila lagun bildu ziren Bordeleko Eskualdunen Biltzarrak Ondarean Egunean eratutako euskal azokara

2012/09/18

Jende asko ibili zen Jauregiaren Plazan egin zen merkatuan (argazkia BordeleEE)

PUBLIZITATEA

Emaitza bikaina izan dute iragan asteburuan Bordeleko Euskal Etxeak Ondarearen Eguna dela eta antolatutako ekimenek. Horien artean nabarmenetakoa izan zen euskal etxeak eta Idoki euskal produktore elkarteak eratu zuten merkatua; izan ere, ia mila lagun igaro ziren bertatik larunbat-igandean. Euskal kutixiekin bisitarien arreta eurenganatu eta gero, musikarekin biribildu zituzten ekitaldiak Eskualdunen Biltzarra elkartekoek. Julian Celaya, Herritarrentzako eta Euskal Gizataldeentzako zuzendaria, eta Bordeleko alkatea, Alain Juppé, bertan izan ziren.

Bordele, Frantzia. Bordeleko Euskal Etxearen arduradunak pozik dira iragan asteburuan Ondarearen Eguna kari antolatu zituzten ekitaldien emaitzarekin, David Mugica presidenteak EuskalKultura.com-i azaldu dionez. Jarduera arrakastatsuena, ezpairik gabe, elkarteak Jauregiaren Plazan jarri zuen euskal azoka izan zen. Horretarako, Euskal Etxeak Idoki euskal produktoreen elkartearen lankidetza izan zuen. Plazan jarri ziren postuetan euskal gaztak, pastelak, artisautza eta beste zenbait kutixi dastatu eta erosi zituzten bordelesek.

Azokatik jende asko igaro zen asteburuan zehar: elkartearen datuen arabera 500 lagundik gora izan ziren larunbatean, eta beste 300 bat igandean. Horien artean, besteak beste, Alaian Juppé Bordeleko alkatea eta Julian Celaya, Eusko Jaurlaritzako Herritarrentzako eta Euskal Gizataldeentzako zuzendaria.

Bordele Ondarearen Eguna 2012 (2)

[Euskal Etxeko dantzari txikiak erakustaldia egiten Bordeleko Jauregiaren Plazan egin zen azokan (argazkia BordeleEE)]

Bordele Ondarearen Eguna 2012 (3)

[Euskal pastel sorta ikusgarri hau jarri zuten salgai Minhondo gozogileek (argazkia BordeleEE)]

Bordele Ondarearen Eguna 2012 (4)

[Euskal azokako postuak bisitatzen, ezkerretik eskubira, David Mugica, Bordeleko Euskal Etxearen presidentea; Alain Juppé, Bordeleko alkatea; eta Julian Celaya, Eusko Jaurlaritzako Herritarrentzako eta Euskal Gizataldeentzako zuzendaria (argazkia BordeleEE)]

Larunbatean 150 lagun bildu ziren Bestalariak eta Etxekoak abesbatzek eman zuten kontzertura, eta giroa oso ederra izan zen, segitzen du David Mugicak. "Ikustekoa izan da kontzertua eta gero, nola jendeak jarraitu dion txarangari, eta kalejira egin dugu Eskualdunen Plazaraino", azaldu du. Ondoren afari legea egin zuten bazkide eta bisitariek euskal etxean eta musikaz eta giro ederraz gozatu ahal izan zuten elkartearen ondoan dagoen Eskualdunen Plazan.

Bordele Ondarearen Eguna 2012 (5)

[Gau epelaz eta giro apartaz gozatzen Euskaldunen Plazan egin zen jaian (argazkia BordeleEE)]

Horrez gain, pilota partidak ere jokatu ziren Bordeleko frontoian eta, euskal etxeak gonbitatua, goi mailako pilotariak aritu ziren lehian. Elkarteak argazki sorta zabal argitaratu du dagoeneko bere Facebook orrian, ohi duen legez.

Bordele Ondarearen Eguna 2012 (7)