euskalkultura.eus

New York, AEB. AEBetako Ekialdeko kostan egiten ari den enpresaritza-misioaren erdia bete du dagoeneko Patxi Lopez lehendakariak. Ostiralean Dallasen estatu honetako energia arloko enpresekin bildu zen eta 'Petroleum Club' delakoan egin zen harreran parte hartu zuen. Larunbatean New Yorken izan zen eta bisita egin zuen Eusko Etxera, Etxeorratzen Hiriko euskal komunitatearekin biltzeko. Eusko Etxea AEBetako euskal etxerik zaharrena da eta 2013an ehun urte beteko ditu.

Euskal elkartean Canal Vasco katearen aurkezpena egin zuen Lopezek, EITBko zuzendari nagusi Alberto Suriorekin batera. Galaxy 23 satelitearen bitartez, orain AEB osoan eta Kanadan ere ikus daiteke Canal Vasco katea. Lehendakariak adierazi zuenez "Euskadi mundura irekitzea eta mundua Euskadira erakartzea" ahalbidetzen duen "komunikazio tresna" izango da Canal Vasco.

Igandean Lopez New Yorkeko Zero Gunean izan zen, Dorre Bikien atentatuan hil ziren biktimei omenaldia eginez. Bertan egindako adierazpenetan lehendakariak atzo Donostian egin zen Nazioarteko Bake konferentzia "errespetatzen" zuela azaldu zuen, eta "ETAri eta bere ingurukoei aukera hau baliatzeko" deia egin zien. Atzo Lopez Basque Culinary Center eta Culinary Institute of America erakundeen arteko lankidetza hitzarmenaren sinadura ekitaldian izan zen, besteak beste. 

[Patxi Lopez lehendakaria New Yorken (argazkia Irekia)]

Bidaiaren bigarren partea

Gaur Bostonen izango da euskal ordezkaritza eta bertan Massachusetts-eko Gobernadorearekin, Deval Patrick-ekin, bilduko da Lopez. Ondoren Progenika euskal enpresaren laborategi berria bisitatuko du eta Harvard University-n egingo den 'cluster'-ei buruz jardunaldian parte hartuko.

Bihar Washington hiriburura joango da eta hitzaldia emango du John Hopkins Unibertsitatean. Etzi New Yorken turismoa eta nekazal industriako produktuak sustatzeko ekitaldia egingo du bera buru duen ordezkaritzak eta, bidaiari bukaera emanez, etzidamu Gamesa enpresak Trenton hirian duen lantegia bisitatuko du.