euskalkultura.eus

Shanghai, Txina. Patxi Lopez lehendakariak Kunshan eta Qiandeng-eko gobernuekin sinatu zuen hitzarmenari esker, euskal enpresek Kunshanen lekutzeko erraztasunak izango dituzte. Akordio honen bitartez Mondragon taldeak bere enpresa-parkea 200.000 metro karratu baino gehiago handitu ahalko du enpresa berri horiek hartzeko.

Parkearen zabalkuntza Mondragon taldeak 80 hamarkadan Txinan lekutu zenean egin zuen 'apustuaren arrakastaren isla da', Patxi Lopezen esanetan, eta orain, 15 urte geroago, Euskal Herria 'aliatu estrategiko' maila izatea sustatzeko helburua du. Mondragon taldeak Kunshanen daukan enpresa-parkearen hedapenak 500 lanpostu sortzea espero da, bertan instalatuta dauden enpresek guztira kontratatuta daukaten langile kopurua 2.500 lagunetara iritsiz.

Basque Culinary Center

Beste jarduera aipagarrienetako bat Shanghako Meliá hotelean egiten ari den Euskal Gastonomia Astearen inaugurazioa izan zen. Euskal Herriko sukaldari onenetakoak izan ziren bertan: Eneko Atxa, Juan Mari Arzak, Martín Berasategi, Andoni Luis Aduriz eta Pedro Subijana. Euskal ordezkaritzak txinatarrei Basque Culinary Center gastronomia fakultatea aurkezteko probestu zuten ekitaldia. Aldi berean, puntako euskal diseinatzaileek euren lanaren erakustaldi bat egin zuten. Izan ere, Euskadiko moda eta gastronomia, turismoarekin batera, dira Shanghaiko Expoan ospatzen ari den Euskadiko Astearen ardatzetako batzuk.