euskalkultura.eus

Szeged, Hungaria. Hungariako Szeged hiriko Euskara eta Euskal Kultura irakurletzak Euskal Astea abiatu zuen larunbatean, Budapesten. Irekiera ekitaldia Picasso Point delako gunean egin zen kontzertua izan zen. Bertan, euskal eta hungariar folk musika uztartu zituzten Izaskun Perez irakurleak eta Gobe taldeak, irakurletzako euskara ikasleek dantza erakustaldia eskaintzen zuten bitartean.

Gaur, ekitaldiek Szeged hirira egingo dute jauzi, eta arratsaldeko 19:00etan musika eta dantza erakustaldi berri bat egingo da, oraingoan Millenium Plazan. Izaskun Perezekin batera, Samli taldea ariko da.

Euskal zinea

Bihartik aurrera euskal zinea izango da jardunaldiotako protagonista eta, orotara, lau euskal film luze izango dira ikusgai. Emanaldiak Szeged Unibertsitateko Hispaniar Ikasketa Sailean egingo dira. Bihar Pablo Berger bilbotarraren "Blancanieves" luzemetraia arrakastatsua izango da ikusgai eta etzi Julio Medem donostiarraren "Los amantes del Círculo Polar" lanak hartuko dio lekukoa.

Hurrengo bi filmak euskaraz izango dira: ostegunean, ikusgai izango da Jon Maia bertsolariak zuzendutako "Gazta zati bat" dokumentala eta, ostiralean, jardunaldiei amaiera emanez, Fernando Bernues eta Mireia Gabilondo zuzendarien "Kutxidazu bidea, Ixabel" luzemetraia ezaguna.