Harry Potter ere euskaldun: Korrika 18 Leipzigeraino heldu zen, unibertsitateko euskara ikasleei esker

2013/03/19

Leipzigeko Liburu Azokan otakuak mozorrotuta, tartean harry Potter euskaltzalea, Unibertsitateko euskara ikastaroko ikaslea (argazkia ULauzirika)

PUBLIZITATEA

Euskara irakurletza zabaldu du aurten Etxepare Euskal Institutuak Alemaniako Leipzig hirian eta lehen seihilekoan dagoeneko 40 ikaslek parte hartu dute bertan. Iragan larunbatean, ikasle horiek Korrika 18ri ongi etorria egin zioten, kanpus elurtuan barrena euskararen aldeko lasterketatxoa eginez. Horrez gain, Korrikak hiriko Liburu Azokako otakuen sostengua ere eskuratu zuen. Zergatik? Bada, Harry Potter ere euskara ikasten ari delako.

Leipzig, Alemania. Indartsu abiatu da aurten Universität Leipzig-en Euskara eta Euskal Kultura irakurletza, Unai Lauzirika irakaslearen zuzendaritzapean. Aurreneko seihilekoan ikastaroan parte hartu duten 40 ikasleek, euskara ikasteaz gain, euskal kulturan sakondu dute (bereziki historian eta antropologian). "Udarari begira irakasgaiak zabalduko dira (euskal musika, zinema e.a.) eta ekitaldi batzuk prestatu ditugu dagoeneko", azaldu dio EuskalKultura.com-i Lauzirikak.

Euskal kulturan sakontzeko ahalegin horretan, ikasleek Korrika 18 dela eta ekitaldi berezia antolatu zuten. Taldetxo polita bildu zen horretarako eta, Korrikaren petoak soinean, lasterketatxoa egin zuten unibertsitateko kanpusean barrrena, Leipzigeko Operaraino. Eguna hotza zen, eta kanpusa elurtuta zegoen, baina hala ere giro ederra izan zuen ekitaldiak.

Korrika 18 Leipzig

[Leipzig-eko euskara ikasleek unibertsitateko kanpusean abiatu zuten lasterketa (argazkia ULauzirika)]

Alabaina, Korrikaren aldeko ekitaldiak ez ziren horrekin amaitu; izan ere, euskararen aldeko lasterketak Leipzigeko Liburu Azokan ere izan zuen isla. Martxoaren 14tik 17ra bitartean egin zen azoka, Frankfurteko liburu azokaren ondoren Alemania mailan ekitaldirik garrantzitsuena. Honek, baina, badu berezitasunik: "Anime-Manga Fans" izeneko guneak Japoniako marrazki bizidunen eta komikien zale andana biltzen dituela, Alemaniakoak zein atzerrikoak.

Gauzak horrela, azokak ziurrenik Korrikaren edizio honetako irudi bitxienetako batzuk utzi zizkigun, azokako otakuek (komikietako pertsonaietaz mozorrotzen diren zaleak) ekimenari sostengua adierazi ziotenean. Eta zergatik? Bada, horietako batzuk -- Harry Potter eta lagunak-- euskara irakurletzako ikasleak direlako!

Korrika 18 Leipzig Otakuak