euskalkultura.eus

Maider Varela/Habana, Kuba. Estreinakoz antolatu dute aurten Habanan San Fermin Eguna eta jendeak ezin hobe erantzun duela adierazi dute antolatzaileek. Eguerdiko ordu bietan eman zitzaion hasiera Habanan Sanfermin Egunaren ospakizun jaiari, Kubako Euskal Etxeak antolaturik. Ekitaldia Cacahual memorialean egin zen, Habana inguruan dagoen baserri batean.

Renato Garcia Eguskizak, Asociación Vasco Navarra Elkarteko lehendakariak, abiatu zuen jaia, ongi etorri hitz batzuekin. Berak azaldu zuenez, ekitaldi hau tradizio berria sortzeko asmoarekin antolatu zuten irlako euskaldunek eta "gerora begira ere, euskal kultura eta historia berreskuratzeko eta zabaltzeko lanetan jarraitu nahi du Elkarteak", esan zuen.

Ekitaldiak herri bazkari batekin jarraitu zuen eta arratsaldean Ray Fernandez trobadoreak kontzertua eman zuen. Ondoren, kantu eta umore giroa gailendu zen. Zapi gorria banatu zitzaien partehartzaile guztiei eta seiak aldera San Fermini kantatuz eman zioten bukaera festari.

Ekitaldia euskal etxeak finantziatu zuen, baina horrez gain Kuban dauden euskal enpresarien laguntza ere izan zuten antolatzaileek. Berrogeita hamar bat lagun bertaratu ziren, elkarteko bazkide eta Kuban bizilekua duten euskaldunen artean.

Kubakoa etxerik gabeko Euskal Etxea da, eta horrek jarduerak antolatzeko orduan gauzak zaildu egiten dituenez, bazkideen ustez egoitza baten beharra ukaezina da. Alta, aurrera begira baikorrak dira euskal etxeko bazkideak eta hasiak dira jadanik etxe bila.