euskalkultura.eus

Saladillo, Argentina. Ospatzeko arrazoi anitz dauzka Saladilloko euskal etxeako. 15 urte bete ditu eta denbora honetan lan paregabea egin du herriko euskaldunen eta euskaldunen ondorengoak biltze aldera eta eurei eta euskal kulturarekin disfrutatzen duten guztiei mota askotako proposamenak eskaini ahal izateko.

Arrazoi horiek guztiek bultzatuta, erakundearen 15. urtebetetze jaia burutu zuten saladillotarrek joan den uztailaren 8an. Hitzordua giro ederrean burutu zen eta beste euskal etxe batzuetako ordezkariak ere elkartu zituen, tartean Chivilcoy, Chacabuco eta Cañuelasekoak. Izan ere, Cañuelaseko Denak Bat-eko dantzariak izan ziren gaueko dantza erakustaldiko protagonistak. Musika, berriz, Arrecifeseko Maral-ekin heldu zen jaira. Mariana Domine abeslari duen taldeak Euskal Herriko eta Argentinako abesti tradizionalak kantatu zituen eta abestera ez ezik, dantza egitera ere animatu zuen publikoa.

[Lagun ugari, edade guztietakoak eta poz pozik Itxaropen Euskal Etxearen urteurren jaian (argazkiakEE)]

[Alkandora zuri eta zapi gorriz jantzi, Itxaropen-go kideak arduratu ziren afaria zerbitzatzeaz (argazkiaEE)]

Gauerdia pasata --Independentziaren Eguna hasi berritan-- Argentinako ereserkia abestu zuten gonbidatuek. Orduantxe Carlos Antonio Gorosito alkate saladillotarra bertaratu eta euskal gizataldearen jaian parte hartu zuen, Itxaropen-go lehendakari Hector Eduardo Altamira-ri 50.000 pesoko txeke bat emanez. Euskal erakundetik EuskalKultura.com-i adierazi zaionez, instalazio elektrikoa eta gas-instalazioa egiteko erabiliko da dirua.

[Iazko esperientzia errepikatuz, aurtengo jaian ere Arrecifeseko Maral taldeak jo du (argazkiaEE)]

[Carlos Antonio Gorositok diru-laguntza eskuratu zion Itxaropengo lehendakari Hector Altamirari (argazkiaEE)]

Gogora dezagun Udalak Udal Interesekoa izendatu zuela Itxaropen Euskal Etxearen 15. urtemuga. Urteurrenaren programaren baitan Argentinako Mus Txapelketa Nazionala antolatu du euskal etxeak abuztuaren 17tik 19ra bitartean.