euskalkultura.eus

Donostia-San Sebastián. PuntuEus erakundea 2008ko apirilaren 2an jaio zen, Euskara eta Euskal Kulturaren Komunitatea osatzen duten 50 erakundeak (Euskaltzaindia, EiTB, EHU, Euskal Herriko Telekomunikazio Ingeniarien Elkartea eta Elhuyar, besteak beste) ordezkatzeko helburuarekin. Proiektu honen asmoa euskara eta euskal kultura bultzatzea da.

ICANNek .eus egitasmoa onartu zuenean, sustatzaileek hau esan zuten: “.eus domeinuaren benetako bidea orain hasten da. Bost edo sei hilabete beharko ditugu falta diren pausoak emateko, eta, abian dagoenean, erabiltzea, ezagutzera ematea eta indartzea izango da zentzua emateko bidea”.

Egitasmoaren arduradunen esanetan, “Internetek, kultura-aniztasuna mailarik gorenean kokatzen du eta, horren baitan, gaur egun euskarak eta euskal kulturak Interneteko aterpe teknologiko propioa izan dezakete: .eus domeinua.” Hari beretik, domeinu honek euskara beste hizkuntzen mailan kokatuko duela diote.