euskalkultura.eus

Mallorca, Illes Balears. Mallorcako euskal etxeak urtean zehar kultura arloan antolatzen duen ekitaldi eskaintzaren barnean behar da kokatu Euskara Barnetegia, hizkuntza eta beste hainbat kultura adierazpide uztarturik. Apirilaren 27 eta 28an garatua, hamasei partaide bildu zituen euskararekin batera besteak beste dantza, txalaparta, gastronomia eta ororen buru giro euskaltzalea partekatzeko.

Euskara mailaren arabera bi talde eratu ziren, beheko eta erdikoak, eta eguraldi txarrak gehiegi lagundu ez bazuen ere, ikasleen ikasteko eta irakasleen partekatzeko gogo biziak giro bikaina sorrarazi zuen. Ikasleen artean mallorcarrak eta bertan bizi finkatutako euskal herritarrak zeuden, baita, esaterako "euskaldun batekin ezkonduta hemen bizi den holandar bat ere".

Irakasleen artean, bertakoez gain, aritu ziren tailerren emaile Kinku Zinkunegi HABEko irakasle eta teknikaria Donostiatik etorria; Madrildik, Ane Bastida irakaslea, hiru euskara ikasleren espedizio bateko buru; txalaparta tailerreko gidari Gorka Salas iruinsemea, eta dantza irakasle, aurretik Mallorca ibilitako baina egun Bordelen bizi den Ander Salazar.

Mallorcako Artea Euskal Etxeak euskara, txalaparta, abesbatza, trikitixa, musika eta beste hainbat tailerren eskaintza egiten die urtean zehar bere bazkideei eta bertako biztanleei. Egunotan, San Juanak direla eta txango baterako deia egin zuen, irlan bertan dagoen Behatoki Astronomikoa bisitatzeko, trikitilariak ere egunaren alaigarri, hau guztia bazkide duen pertsona batek bertan dituen ezagutzak baliatuz, hitzaldi bat eta behatokiko kupula zabaltzea barne.