euskalkultura.eus

Shaoxing, Txina. Orereta Abesbatza Errenteriako Andra Mari Koru Elkarteko parte da --izan ere bertako koru gaztea-- eta pozik adierazi dute bertaratutako iturri errenteriarrek euren taldea bigarren sailkatu dela haur abesbatzen kategorian, Indonesiako Karangturi Choir abesbatzaren atzetik. Folklore alorrean ere bigarren sailkatu dira, beste koru indonesiar baten ondotik hemen ere, Vocalista Paradisso Choir geratu baita lehenengo.

Orereta Abesbatza 13 eta 16 urte bitarteko 42 neska eta 3 mutikoko talde batekin aurkeztu da agertoki txinatar honetara, Imanol Elizasu Kasa zuzendari. Txinara egin duten bidaia honek koru bilkura honetan parte hartzea zeukan lehenengo helburu, baina hori egitearekin batera bisita egin diote Shanghai hirian zabalik den Nazioarteko Expo Azokari, bertako Bilboko pabilioan kantatuz hain zuzen ere, eta baita Txinan dagoen euskal etxe bakarra, Shanghain egoitza duena, bisitatuz eta bazkide eta lagunak agurtuz.

Datorren igandean, uztailaren 25ean, koru talde gipuzkoarrak bigarren parte hartze bat egingo du Shaoxing-eko mundu norgehiagokaren bigarren fasean, oraingoan eliz musika kategorian. Orereta Abesbatza da, Iñaki Tolaretxipik zuzentzen duen Landarbaso Abesbatzarekin batera, euskal abesbatzek Txinako elkarretaratzearen VI. edizio honetara bidali duten ordezkari bakarra.