euskalkultura.eus

Bilbao, Bizkaia. Bizkaiko Abokatu Bazkuneko Koruak Argentinara bidaia egingo du datozen egunetan, Buenos Aires hirian bi kontzertu eskaintzeko asmoarekin. Hasteko, martxoaren 2an Coro del Colegio Público de Abogados de la Capital Federal koruarekin batera emanaldia eskainiko dute Avenida Corrientes 1441 helbidean. Hurrengo egunean, martxoaren 3an, Laurak Bat euskal etxean kantatuko dute, Lagun Onak abesbatz euskal-argentinarrarekin batera.

'Buenos Airesen astebete baino ez gara egongo', azaldu dio EuskalKultura.com-i koruko arduradun Jose Antonio Lozanok, 'baina denbora horretan hiriko euskal etxeak bisitatu eta hango euskaldunak ezagutu nahiko genituzke'. Bidaia honetara koruko 22 lagun joango dira, Karmele Barrena zuzendari bermeotarraren zuzendaritzapean. Taldearen errepertorioa oso zabala da eta musika sakratu, klasiko eta herrikoia jorratzen du koruak. Euskal musikagileek leku berezia dute euren kantaldietan.

Musikak batu

Korua osatzen duten lagunak lanean ari diren abokatuak dira, denak Bizkaiko Bazkuneko kideak. Hainbeste denbora eta engaiamendu esijitzen duen lanbide batekin, nondik ateratzen dute entsaiatzeko denbora? 'Eguerditan biltzen gara entsaiatzeko, astean bitan', erantzuten du Lozanok. 'Musikak pertsonak elkartu egiten ditu eta guk koruarekin asko gozatzen dugu'.

Koruak atzerrian hainbat kontzertu eskaini ditu, hamabi urtetako ibilbidean: Catania (Italia), Parise, Bruselas... Horrez gain arlo profesionaleko hainbat ekitalditan ere parte hartu du: Espainiako Abokatuen VI. Mintegia (A Coruña), Nazioarteko Abokatuen Batzarraren XL. Mintegia (Madril), Bartzelonako Abokatu Bazkuneko Eguna (Palau de Montjuich), Euskal Abokatuen III. Mintegiko itxiera ekitaldian (Bilbo), eta abar.