Chino, Kalifornia, AEB. Euskal Etxe mailako txapelketak egin ostean, Chinoko Euskal Etxearen egoitza izango da larunbat honetan, ekainaren 18an, 2022ko NABO Mus Txapelketako finalaren egoitza. 39 bikote lehiatuko dira Estatu Batuetako txapela irabazi eta herrialde honetako ordezkari izateko urrian Boisen egingo den mundu mailako txapelketan. Biharkoko antolatzaile, Pierro Etcharren buru duen NABOko Mus arloa, eta ekitaldien egoitza izango den eta tokiko programa abegikor osatu duen Chino Basque Club bera.
Herrialde osotik gerturatuko dira bihar euskal etxe eta elkarte partaideeetako muslari eta delegatuak. Hitzordua goizeko 7:30etan hasiko da, partaideak erregistratzearekin. Baieztatuko da, besteak beste, erakunde bakoitza egunean egotea NABOrekiko kuota eta ordainketei dagokienez, eta egunari dagozkion xehetasunak emango dira. Txapelketa, berez, 8:00etan hasiko da eta egun osoan zehar garatuko, bazkarirako tartetxo bat barne. Partidak lau erregetara dira eta zorrotz eutsiko zaie argitaratutako arauei.
Argentinan ere Txapelketa
Asteburu honetan bertan, bestalde, Argentinak ere erabakiko ditu nazioarteko txapelketara bidaliko dituen ordezkariak. Argentinako final nazionala bihar eta etzi, ekainaren 18 eta 19an, jokatuko da Buenos Aires probintziako Ayacuchon, bertako Euskal Odola Euskal Etxea eta FEVA antolatzaile, 16 bikote lehiakide.
Ez da oraindik pandemia aurrekoa berreskuratu, baina azkeneko bi urteetan COVID-19ak baldintzatuta, inguratuko diren muslariek gogo handiz inguratuko dira bihar Chino eta Ayacuchora. Estatu Batuei dagokienez, 2019an jokatu zen azken txapelketa nazionalak, Nevadako Winnemucan, 44 bikote bildu zituen, eta 11 orduko ekitaldiaren ondotik Los Banoseko Euskal Etxeko Victor Albistur eta Martin Hirigoyenek irabazi zuten txapela, bigarren Bakersfieldeko Kathy Iturriria Laverty and John Iturriria izanik
Lagun bati bidali
Komentarioa gehitu
