euskalkultura.eus

Berlin, Alemania. Berlingo Euskal Etxeak Baskisches Kino Fest zinemaldiaren balioespen baikorra egin du, ekitaldietara bildu diren ikusleen kopurua eta parte hartzea azpimarratuz. Urriaren 30ean abiatu zen jaialdia, Izarren Argia luzemetraiarekin. Ainhoa Añorga Euskal Etxeko presidenteak zinemaldia aurkeztu zuen emanaldian, jaialdia Gernikako bonbardaketaren 75. urteurreneko ekitaldien parte zela azalduz.

Bigarren saioa urriaren 31an izan zen, Asier Altuna zuzendariaren Bertsolari filmarekin. Bertsolaritzari buruzko dokumentalak jende asko erakarri zuen eta Altunak gustura erantzun zituen proiekzio ondorengo galderak. Solasa Moviemento zineman gauerdira arte luzatu zen.

[Ikuslez bete zen emanaldi guztietan Moviemento zinemako aretoa (argazkia BerlinEE)]

Azaroak 1ean, Joxean Fernandez Euskadiko Filmategiko zuzendariak  “El cine y la Guerra Civil en el Pais Vasco” hitzaldia eman zuen eta ondoren azken urteotako euskal laburmetrai esanguratsuenen proiekzioa aurkeztu zuen.

[Joxean Fernandez, erdian, eta Ainhoa Añorga presidentea eskubian (argazkia BerlinEE)]

Leipzigen ere

Zinemaldiak ekitaldi paraleloak izan zituen Leipzig-en, bertako unibertsitatean sortu berri den Euskal eta Euskal Kultura irakurletzak antolatuta. Azaroak 1ean Asier Altunak Bertsolari filma  aurkeztu zuen, Etxepare Institutuaren babesarekin prestatu zen proiekzioan.

Azaroak 2an, Joxean Fernandezek “El cine y la Guerra Civil en el Pais Vasco” hitzaldia eman zuen IALT Itzulpengintza eta Hizkuntzalaritza Aplikatuaren Institutuan. Ekitaldiak erromanistikako eta itzulpengintzako ikasleak erakarri zituen, eta Leipzig-eko lektoreak, Unai Lauzirikak, gidatu zuen ondorengo solasa.

[Asier Altuna zuzendaria Leipzig-en (argazkia Berlin EE)]

Zuloak-en kontzertua

Berlinen, azaroak 2aren gauean Zuloak filmea izan zen ikusgai Moviemento zineman, Fermin Muguruza zuzendaria eta Zuloak taldeko kideak bertan zirela. Musikari irundarraren azken filmak jende andana erakarri zuen eta harrera ona izan zuen filmak. Emanaldi osteko solasaldian zuzendariak zein taldekideek erantzun zieten ikusleen galderei.

[Fermin Muguruza eta Zuloak taldeko musikariak dokumentalari buruzko solasaldian (argazkia BerlinEE)]

Azaroaren 3an animaziozko filmeek eman zioten amaiera zinemaldiari. Hasteko, Berlinen bizi den Aitor Auzmendi zuzendari gazteak bere Tarantela laburmetraia aurkeztu zuen, eta ondotik aurkeztu ziren Zeinek gehiago iraun eta Daisy Cutter laburrak. Amaitzeko, Asisko Urmeneta marrazkilariak Gartxot animaziozko luzemetraia aurkeztu zuen. Proiekzioa ondoren bi ordu iraun zuen marrazki eta galde-erantzunen artean luzatu zen solasak.

Jaialdiari amaiera bikaina eman zion Zuloak taldeak Clash aretoan eman zuen kontzertuak. Zuloak-eko emakumeek eskainitako zuzenekoa Fermin Muguruzak osatu zuen eta festak goizaldera arte iraun zuen Lucha Amada kolektiboko DJen ekinarekin.