euskalkultura.eus

Valladolid, Espainia. Gure Txoko elkarteak iragan igandean egin zuen aurreneko Euskal Jaia, eta, Jokin Oncalada bazkideak EuskalKultura.com-i agertu dionez, elkartearen asmoa euskal  kultura "txokoaren lau pareten artetik ateratzea" zen.

Eguna goizean goiz hasi zen, Santo Domingo de Guzman parrokian egin zen mezarekin. Euskal Etxeko koruak elizkizunean parte hartu zuen eta ondoren euskal kanta herrikoien kantaldia eskaini zuen elizaren atarian. Ondoren abesbatzak hiriko kaleetan barrena osteratxoa egin zuen eta gune zentrikoetan kantaldiak eskaini zituen, hala nola Valladolideko plaza nagusian.

[Koruko kide batzuk Valladolideko plaza nagusian (argazkia ValladolidEE]

[Gure Txokoko txikiek ere bat egin zuten jaiarekin (argazkia ValladolidEE)]

Eguerdian bazkide taldea euskal etxera itzuli zen eta lagunarteko bazkaria egin zuten. Bazkalostean txikientzako jokoak eta jarduerak egin ziren, euskal kulturaren alde desberdinak jolasen bitartez ezagutzen laguntzeko.

Elkarteko bazkideak oso pozik agertu dira Euskal Jaiaren aurreneko edizio honek izan duen harrera onarekin eta datozen urteetan ere tradizio jaio berri honi eusteko asmoa agertu dute.