euskalkultura.eus

San Miguel, Argentina. Euskal filmak ez dira Argentinako zine areto komertzialetara erraz iristen. Hori dela eta hainbat euskal etxek ahaleginak egiten dituzte pelikula horiek eskuratu eta zabaltzen. Azken bolada honetan, euskal zine zikloak ugaritu egin dira Argentinan eta duela gutxi arte ezezagunak ziren izenburu eta zuzendariak, ezagunagoak eta erreferentzia izenak bilakatzen ari dira.

San Miguelgo Askatasunaren Bidea ez da fenomeno honetatik kanpo geratu eta zinemazaleei ez ezik komunitate osoari luzatzen die datorren larunbateko saio honetan parte hartzeko gonbitea. Montxo Armendariz-en 'Bihotz ondoko sekretuak' arratsaldeko 4etan emango da, San Miguelgo Udalaren Museo Historikoan, Urquiza Tren Geltokiaren aurrean. Filma bukatzean, askaria partekatuko dute lagunek. Nafarroaren banderak eta beste oroigarri batzuk ere ezarriko dituzte elkarteko kideek salgai.

Elkarteak segitzen du, bestalde, berte ohiko euskara tailerrarekin. Elkarretaratzetan euskara eta euskal kultura lantzen da. Mariana Fernandez Castelli koordinatzaile. Eskolak hilabete bakoitzaren hirugarren ostiraletan gauzatzen dira, arratsaldeko 4etatik 6etara eta datorrena urriaren 18an izango da. Klaseak Udalaren Domingo Faustino Sarmiento Liburutegiaren egoitzan ematen dira hamar ikasle partaide.

[Euskara Tailerreko ikasle batzuk klasean (argazkiaEE)]

Behar da aipatu, bestalde, Askatasunaren Bidea-ren bloga (ikusi hemen) oso aktibo mantentzen dela; webgunea astero eguneratu ohi da, bertako eta Euskal Herriko laguntzaileei esker.