euskalkultura.eus

Valladolid, Espainia. Valladolideko Gure Txoko elkarteak mende laurdena bete du euskal kultura Gaztela-Leongo hiriburuan zabaltzen. Rodrigo Anton da joan den urtez geroztik elkarteko lehendakaria eta Juan Tomás García-Iturri Ulibarri lehendakariordea. Elkartea Valladolideko euskal komunitatearen topagune garrantzitsua da eta nahiz eta Euskal Herritik nahiko gertu dauden, herrimina lagun artean eta bazkari goxo baten inguruan hobeto sendatzen dela uste dute bazkideek.

Mende laurdeneko ospakizunak otsailaren 27an hasi ziren, bazkideek egin zuten afari batekin, eta ondoren, 28an, euskal etxeak ateak ireki zituen Valladolideko hiritarrei bertara etorri eta elkartea ezagutzeko gonbitea eginez. Ondoren, arratsaldeko seietan meza elizkizuna egin zen Valladolideko katedralean, hiriko gotzainak gidatuta. Ekitaldi honetan Valladolideko hainbat agintari eta hiriko beste kolektibitateetako ordezkariak bildu ziren.

Elkarteko abesbatzak bere kantuekin parte hartu zuen elizkizunean. Mezatik irten eta elkarteko dantzari batek ohorezko aurreskua dantzatu zuen eta ondoren parte hartzaile guztiak euskal etxera itzuli eta askari bat hartu zuten euskal etxean. Hurrengo egunean, igandean, elkarteko korua Villagarcía de Campos herrian izan zen, bertan meza elizkizunean parte hartuz.

Ospakizunak hil bukaeran jarraituko dute, martxoaren 28tik 4ra egingo den kultur aste batekin. Bertan herri kirol lehiaketak izango dira ikusgai --harrijasotzaile eta aizkolariak, besteak beste-- eta elkarteko koruak hainbat emanaldi eskainiko ditu. Bestalde, euskal etxea hiriko beste kolektibitateekin batera gastronomia topaketa bat prestatzen ari da.