euskalkultura.eus

Valladolid, Espainia. Igande honetan Valladoliden egingo da espainiar estatuko euskal etxeen federazioaren urteroko bilkura eta, horrekin batera, asteburuan zehar elkarteak estatuko euskal etxeen mus txapelketa ere hartuko du.

Ekitaldiak etzi hasiko dira, Gure Txokon. Bartzelonako Euskal Etxeko ordezkari Andres Fernandezek txapelketaren nondik-norakoak azalduko ditu: nola jokatuko diren partidak eta zein izango den txapelketaren antolakuntza, besteak beste. Horrekin abiatuko da lehia eta larunbat osoan zehar eta igande goizean ere egingo dira partidak. Larunbat eguerdian muslariek eta eurekin Valladolidera etorri diren ordezkariek lagunarteko bazkaria egingo dute Gure Txokoren egoitzan.

Igande goizean, esan bezala, finaleko partidak jokatuko dira eta eguerdi osteko ordu batean egingo da euskal etxeen federazioaren bilkura. Topaketaren ondoren ordezkariak, muslariak eta Gure Txokoko bazkideak mahainguruan bilduko dira eta asteburuari bazkari batekin emango diote amaiera. Bazkalostean sari banaketa eta txapelketaren itxiera ekitaldia egingo dira.

Parte hartuko duten ordezkaritzak

Honakoak dira txapelketan parte hartuko duten ordezkaritzak:

-Bartzelonako Euskal Etxea: Andres Fernandez, Norberto Rodriguez eta Aitor Arruti
-Valentziako Euskal Etxea: Juan Dorronsoro e Yllana
-Salouko Euskal Etxea: Anton Ibargaray, Jose Luis Perez Zigarran eta Maria Jesus Olivares
-Madrilgo Euskal Etxea: Jorge Sagarminaga, Juan Pablo Burgueño, Julio Elejalde (presidente), Iñaki Sagarminaga (idazkari) eta Jesus Martin (diruzaina) federazioko zuzendaritza batzordeko kideak eurak
-Mallorcako Euskal Etxea: bi ordezkari (oraindik nortzuk diren baieztatu gabe)
-Valladolideko Euskal Etxea: Agustin Hormaeche eta Alberto de Antonio (munduko mus txapeldunak), Ricardo Garcia Anton eta Luis Garcia Alkorta