euskalkultura.eus

Donostia-San Sebastián. Gabonetarako lagun eta senitartekoie bidaltzeko zorion postal berezi horren bila ari bazara, zer iruditzen zuk zeuk egitea? Ikastolen elkarteak horretarako aukera bikaina eskaintzen du, "ZoriON" aplikazioaren bitartez. 

"ZoriON" Android mugikorrentzako eskuragarri dago, eta doan deskarga daiteke. Erabilera oso intuitiboa da eta erraz asko osatu daitezke postalak. Aurreneko pausua aplikazioa deskargatzea da, noski. Horretarako jo sakelekoaren Google Play dendara eta bila ezazu han "ZoriON". Edo GooglePlayren webgunean sartu eta bertatik "ZoriON" aplikazioa deskarga ezazu.

Behin aplikazioan sartuta, aukeratu egin behar dira hondoak, pertsonaiak eta irudian jartzeko zerbait elementu. Hondoen atalean, nahi izanez gero geure argazki bat (familia, etxeko txikiak, herria...) erabil daiteke ere, gero horren gainean pertsonaiak gehituz. Ondoren, postalari nahi dugun testua gehitu eta kitto!, sare sozialen bidez bidaltzeko prest dago.

Etxeko txikiek maiteko duten aplikazioa da, beraiek sor ditzaketelako postalak eta bertan ikastolako klaseetako pertsonaia ezagun asko aurkituko dituztelako (Argitxo, Ttantto, Txirritx eta Xango...).

Aplikazioa lau hizkuntzatan dago eskuragarri: euskara, gaztelania, ingelesa eta frantsesa.