Carson City, Nevada, AEB. Kostatu zaio, baina azkeneko saiakerak eman ditu fruituak eta euskaldunen Picon Punch-a Nevadako estatu-edari izendatu dute. Halaxe sinatu zuen Nevadako legealdiaren azken honetan, ekainaren 9an, Estatuko gobernadore Joe Lombardok, aurretik urteetan zehar zenbait aldiz saiatu izan dena azkenik gauzatuz. Lege-proiektua, "Bill 375" izenpean, Steve Yeager demokrataren eta Bert Gurr errepublikanoaren babesean aurkeztua, 41-1 onartu zuten Asanblean, eta 20-1 Senatuan, lehenengoan Heidi Kasama errepubikanoaren eta bigarrenean Marilyn Dondero Loop senatariaren aurkako bozka bakarrekin. Onartu zuten Nevadaren euskal historia aberatsari keinu bezala. Baina zer da "Picon Punch" delako hori, Nevadan goratua eta Euskal Herrian askok ezagutzen ez dutena?
Estatu Batu Mendebaldeko euskal ostatuetako edari klasiko bat da, tragu arras alkoholduna, cocktail azkarra, Nevadako eta inguruko estatuetan egungo euskal jatetxe eta kantina historiko eta berrietan "Basque" markadun legez zerbitzatzen dutena. Jatorria euskal immigranteei lotua du, eta Nevadan bertan, esaterako, Elkoko Star hotelean, Winnemuccako Martin hotelean, Renoko Louis Basque Corner-en edota Gardnervilleko JT euskal kantinan-eta harro diote eurena dela estatuko Picon-ik onena. Osagaiak aldatu izan ditu historian, bereziki Frantziatik zekarkiten Amer Picon osagaia merkatutik desagertu zenean.
Historia eta osagaiak apur bat gehiago ezagutu nahi badituzu, hona joan den abenduan Jessica Hill-ek Las Vegas Review-Journalen argitaratutako artikulua. Eta bideo bat, JTko Etienne Lekumberry-ren hitzarekin, legea onartu izana komentatuz.
Lagun bati bidali
Komentarioa gehitu
