euskalkultura.eus

Lima, Peru. Peruko euskal komunitateak bere sustraiak ezagutzera eman ditu azken asteetan, hainbat ekitaldiren bitartez. Jarduera gehienak Liman egin dira, baina herrialdeko beste hiri nagusietara ere zabaldu dira, hala nola Piura, Cajamarca, Trujillo, Jauja, Ica, Arequipa eta Cuscora. Izan ere, euskaldunen ondorengoak Peruko bazter guztietara zabaldu dira, XVI. mendean bertan lekutu zirenetik hasita. Eurek sortutako zenbait elkartek gaur egun ere bizirik darraite, horien artean aipagarriena, 1612an Liman sortu zen Arantzazuko Amaren Anaidia.

Azken asteetan euskal ondare aberats hori aldarrikatu dute Perun antolatutako ekimenek. Ekimenak Euskararen Egunean abiatu zen mintzaldi sail batekin hasi ziren, abenduan. Hitzaldiek ehundaka lagun bildu dituzte, euren euskal jatorriei buruz jakiminez. Ekitaldiak Liman egin den anaitasun bazkari batekin amaitu dira.

Ama birjina ibiltaria

Ekitaldi hauen antolakuntzan parte hartu du, besteak beste, Francisco Igartua kazetari euskal perutarraren omenez sortu zen Fondo Editorial Revista Oiga elkarteak. Elkarteko zuzendari Jhon Bazan-ek EuskalKultura.com-i azaldu dionez abenduaren 3tik hona egin diren ekitaldietan Peruko euskal familia askok parte hartu dute, besteak beste Leguia, Pierola, De la Puente, Echenique, Derteano de Aliaga, Goyeneche, Zavala, Barandiaran, Ugarte, Ugarteche, Unanue, Salaverry eta Orbegoso.

Aste hauetako ekitaldien barruan, Limako Arantzazuko Ama Birjinaren erreplika Peruko familia euskaldun hauen etxeetara eraman dute. Duela 33 urte ekarri zuen irudi hau Oñatitik Antonio María Artola Arbiza apaizak eta Arantzazuko Amaren Kofradiari eman zion. Orain irudiak etxerik etxe ibili da, Peruko euskal familiak bisitatuz. Amaitzeko, ekitaldiei itxiera emanez, datorren otsailaren 14an Arantzazuko Amaren Anaidiaren sorreraren beste urteurren bat ospatuko da Liman.