euskalkultura.eus

New Delhi, India. Patxi Lopez lehendakariak asteazkenean bukatu du Indiara egin duen kooperazio eta enpresa arloko bidaia. Misioan Eusko Jaurlaritzak Indian diruz laguntzen dituen lankidetza egitasmoak bisitatu eta, bestetik, euskal eta indiar enpresen arteko harremanak sustatu ditu. Bidaiari bukaera emateko Indian bizi diren euskaldunei harrera egin zien. Ekitaldia euskal ordezkaritzak New Delhin ostatu hartu zuen hotelean egin zen eta bertan izan ziren Indiako euskal komunitateko kideak, eta baita ere enpresa-misioan parte hartutako enpresen ordezkariak, Euskal Merkataritza Ganberen ordezkariak, Confebasken presidentea eta beste zenbait gonbidatu.

Euskaldunen aurrean egin zuen hitzaldian lehendakariak Euskadi Indian pizten ari den interesa azpimarratu zuen eta negozio-arlo askotan liderra dela nabarmendu zuen, hala nola automobilgintzaren sektorean, energia berriztagarrietan, hiri garapenean, garraioan nahiz turismoan. New Delhiko ekitaldira bildu ziren lagunei, Indiarako jauzia egin nahi dutenentzako “sarrera-atea” izan daitezela eskatu zien.

Lopez lehendakariak Euskal Herriko egoerari buruzko hitzak ere egin zituen eta ETAren indarkeria behin betiko amaitzea Euskadiren kanpo-garapenerako faktore erabakigarria dela adierazi zuen. “ETA edukita ere Euskadin gizarte moderno bat eraikitzea lortu badugu, zer ez dugu egingo aurrerantzean!”, erantsi zuen.

Gizarte-ekintza

Bidaiaren lehen partean lehendakariak Anantapur eremuan Garapenerako Lankidetzarako Euskal Agentziaren partaidetzaren bidez sustatzen ari diren zenbait proiektu bisitatu zituen. “Bidaia honetan, lankidetza-funts hotzak aurpegidunak bihurtzea lortzen duten pertsonak ezagutzeko aukera izan dugu. Euskaditik egindako ahaleginei esker, ortu iraunkorrak izateko, behiak hazteko, biogasaren bidez energia lortzeko, mikroenpresa batean lan egiteko, haurdunaldian osasun-arreta izateko nahiz lehen hezkuntzako eskolara joateko aukera duten pertsonak”, esan zuen.