euskalkultura.eus

Madril, Espainia. Carabanchelgo "Casa del Barrio" auzo elkartean egingo da bihar auzo madrildar honetako Bigarren Euskal Jaia. Antolatzaileak auzoko bizilagun talde bat eta Madrilgo Euskal Etxeko zenbait bazkide izan dira, eta Euskal Etxeak sostengua ematen dio jaiari, elkarteko dantzarien eta txalapartarien erakustaldiekin, besteak beste.

Jaiak bigarren edizioa du aurtengoa. Lehendabizikoa 2009ko azaroan egin zen eta arrakasta itzela izan zuen, antolatzaileek adierazi dutenez. "Horrelako egitasmoa burutzea ideia zoroa zela pentsa zitekeen hasieran, baina sekulako arrakasta izan zen". "Azken finean gure hiritik kilometro gutxi batzuetara dagoen errealitate bat geurera ekartzea eta zubiak eraikitzea lortu genuen. Euskara, dantzak, gastronomia eta jaia, euskaldunen eta carabancheldarren arteko bilgarri izan ziren, lagunarteko jai giroan".

Jaiaren ostean esperientzia errepikatzeko eskari asko jaso zituzten antolatzaileek. Horrela, nahiz eta atzerapen txiki batekin heldu den, bihar bertan egingo dute bigarren edizioa. Jaiaren gunea Casa del Barrio auzo elkartea (Avenida de Carabanchel Alto, 64) izango da eta dantza erakustaldia, txalaparta kontzertua, poteoa eta babarrun jana egingo dira bertan. Horrez gain, zenbait sorpresa ere izango direla iragarri dute antolatzaileek.

Bazkariaren prezioa 10 eurokoa da eta parte hartu nahi dutenek izena 625083875 telefonora deituz eman dezakete edo e-maila hona bidaliz: ikaslegatibu@gmail.com edo info@casadelbarriocarabanchel.es.

-Informazio gehiago Madrilgo Euskal Etxearen webgunean edo Casa del Barrio de Carabanchel auzo elkartearen webgunean