euskalkultura.eus

Bahia Blanca, Argentina. Ahitu berria den azaroaren 23an eta hiriko Cooperativa Obrera-k antolatutako euskal zine zikloaren baitan, “Olentzero eta enbor magikoa” pelikula proiektatu zen erakundeko kultur aretoan. Berrogeita hamar bat lagunek hartu zuten parte euskal etxeko Barandiaran liburutegiak bultzatutako ekimen honetan, tartean adin guztietako euskara ikasleek. 

“Arrakasta handia bereganatu zuen filmak. Publikoari izugarri gustatu zitzaion eta gaiak inspiraturik, Euskal Herrian bizi izandako pasadizoak kontatzera animatu zen jendea”, azaldu diote liburutegiko arduradunek EuskalKultura.com-i.

[Euskara ikasleak, Rocio Basterra irakasle eta Olentzerorekin (argazkia EE)]

Filmaren aurkezpena euskal etxeko Emma Vila kideak egin zuen eta proiekzioa bukatuta ustekabe ederra izan zuten txikiek. Pantailatik atera izan balitz bezala, Olentzero agertu zen Cooperativa-ko aretoan. Euskal Herriko ikazkinak, publikoa estonatzeaz gain, gozokiak banatu zituen umeen artean.

Dantzak, aiton-amonak eta musika tresnak

Mugimendu handiko euskal etxea da Bahia Blancakoa eta mugimendu hori erakundeak gauzatzen dituen ekintzetan islatzen da. Dantzariei dagokienez, Necocheako Euskal Astean aurkeztu ondoren, dantzaldi batean hartu zuten parte Beti Aurrerako neska-mutilek azaroaren 30ean. Euskal Herriko eta Argentinako pausoak bildu zituen ikuskizuna Udaleko Antzokian egin zen.

[Aiton-amonen omenezko dantzaldia (argazkia EE)]

Atzera egiten badugu, urriaren 7an aiton-amonen omenezko elkarretaratzea ospatu zuten Union Vasca-ko dantzariek. Urte osoko lanaren emaitzak erakusteko, euskal etxeko txikienek, 8 hilabete eta 5 urte artekoak eta “Txikis Txikis” izeneko taldean bilduta, Txiki Txikiak, Ipurdi Dantza eta Makil Dantza egin zituzten. Ondoren, 6 eta 11 urte artekoek, esan nahi baita “Txikis” taldekoek,  Polka, Kaskarot eta Fandango dantzatu zituzten. Jaia bukatzeko, ume guztiek egin zuten Poxpolo eta Mokolo pailazoen Gora Behera.

[Euskal Musika Tresnen argazki erakusketa (argazkia EE)]

Musikarekin jarraituz eta atzerago eginez, Barandiaran liburutegiaren babesarekin, irailaren 19an Euskal Musika Tresnen argazki erakusketa inauguratu zen Bahia Blancako Rivadavia Liburutegian. Oraingoan ere Emma Vilari egotzi zitzaion ekintza aurkezteko ardura eta esker beroak eman zizkien Rivadavia liburutegiko kideei erakundeko ateak irekitzeagatik. Erakusketa urriaren 8a arte luzatu zen.