euskalkultura.eus

Donostia-San Sebastian. Egunotan asko dira sarean Gabonak zoriontzeko postal bila ari diren euskaldunak eta, urtero legez, EuskalKultura.com-etik lan horretan laguntzeko baliabide zerrenda bildu dugu. Jarraian aipatzen ditugun webgune hauetan euskaraz edo euskal gaiekin edo Euskal Herrian egindako postal birtualak aurkituko dituzue. Doakoak dira eta internet bidez igortzeko klik batzuk egitea baizik ez duzu egin beharko. Hauxe da momentua, ingurukoei edo urrun bizi diren senitartekoei agur bat bidaltzeko!

Euskal postal aukera zabala eskaintzen duen webgune bat HABEren Ikasbil, euskara ikasleentzako gunea da. Postalak originalak eta umoretsuak dira eta horietariko asko animatuak gainera. Irudi moderno eta koloretsuekin jarraituz, klasiko bat dira Kukuxumusu enpresa nafarrak Gabonetarako bereziki sortu dituen postalak: Olentzero, Mari Christmas, Merri Toro eta beste pertsonaia alai eta lotsagabeak dira protagonista. Umore eta ironiaz datozkigu ere Argia aldizkariaren Eguberri postalak, Mantxut atalean.

Badago gehiago www.manycomics.com webgunean; hemen Gabonetako opariak, 12 mahatsak,  Zorionak, Ezinezko misioa... dira postaletako batzuk. Euskarazko postal birtualen webgunean, Postalak.com delakoan, denetariko postalak aurki daitezke, eta horietako batzuk, noski, Eguberritakoak dira.

BiscayTIK, postal berriak

Bizkaiko Foru Aldundiak sustatzen duen BiscayTIK Fundazioak Gabonetako postalak bidaltzeko zerbitzu berria sortu du eta bertan badira euskararekin eta Bizkaiarekin zerikusia duten zenbait postal: Omako basoa, Athletikeko elurrezko gizonak...  Postal hauek erabiltzeko baldintza bakarra Fundazioaren webgunean erregistratzea da.

[BiscayTIK Fundazioaren Eguberri postaletako bat]

Beste aukera bat Zernola.net webguneak proposatzen duena da. Bertan gai desberdinei buruzko postalak aurkituko dituzu, gehienak ez dira zuzenean Gabonekin loturikoak, baina badira erabilgarriak izan daitezkeen zenbait. Kategoriak Zorionak, Urtaroak, Koloreak, Animaliak eta bidaiei buruzko Goazen! atala dira.

Eta azken proposamen bat, oraingoz, Hendaiatik. Lapurdiko herriari buruzko Hendaia.com webguneak ere eskaintzen ditu euskal postal batzuk, eta bakoitzak nahi duen testua gehitzeko aukera.

(Euskal postal gehiagoren webgunerik ezagutzen baduzu, idatz ezazu iruzkina eta zerrendara jasoko dugu)