Munduan zehar euskal etxeek zenbait ekimenez gogoratuko dute gaur Gernikako sarraskiaren 73. urteurrena

2010/04/26

Mar del Plata hiri argentinarrean 73. urteurren hau gogoratzeko egingo diren ekitaldien egitaraua.

PUBLIZITATEA

Apirilaren 26a da gaur. Gaurko egun batez, duela 73 urte, Alemaniako gerla hegazkinek Gernikako hiria bonbardatu eta suntsitu zuten, Franco generalaren eta bere aliatuen mespretxua erakutsiz defensa gabeko hiri eta populazio baten kontra, eta gogor erasotu nahian Euskal Herriaren eta euskaldunen sinboloa den Gernikako hiri eta populuari. Data, urtero gogoratzen dute munduan zehar barreiatutako hainbat euskal etxek, izan ere euren egutegian gorriz markatutako data berezia baita. Artikulu honetan karia honetara egin diren deialdi eta ekimenetako pare bat soilik ez dugu aipatuko.

Buenos Aires, Argentina. Egia da urterik urte gero eta gutxiago direla Euskal Herrian zein Diasporan gelditzen diren Gernikako sarraskiko lekuko zuzenak, baina oraindik ere badira. Orain arte eguna urtero gogora ekartzen zuen bat, San Frantziskoko Felix Bilbao gudariak ez du gehiago egingo, tamalez hil berria baita joan den apirilaren 3an hiri kaliforniarrean, 93 urte zituela. Felixek aipatu izan du Ondarroan zegoela bera egun hartan, eta Gernika bonbardatzera zihoazen hegazkinak pasatzen ikusi zituztela Zamalloako ermitatik. Estatu Batuetan bertan baina barrualderako, Utah estatuan, euren lekukotasuna eskaini diote bertako egunkari bati Madalena eta Jaime Sangroniz senar-emazte gernikarrek. Sangroniztarrak aspaldi emigratu zuten Estatu Batuetara eta bertan jaio eta hazi dituzte, amerikar eta euskaldun, euren lau seme-alabak, eta bilobak. Utah-ko hiriburuko Salt Lake Tribune egunkariak jaso du orduan sorleku eta bizileku zuten Gernikarekin apirilaten 26 hartan gertatu zenaren kontaketa.

Hego Ameriketako zenbait lekutatik ere iritsi dira gure erredakziora gaurko eguna gogoratuko duten euskal etxeen dei eta hitzorduak. Gutxi batzuk bilduko ditugu hona. Argentinako San Luis probintziako Villa Mercedes herritik, bertako euskal etxeak herriko plazan Bakearen eta Askatasunaren aldarrikagarri landatu zuen Gernikako Arbolaren kimu ondoan plaka bat ezarriko du. Horretarako, Udalak deklarazio bat onartu du, berau 'Kultur eta Historia Ondare' izendatuz.

FEVAtik, eta joan astean Buenos Airesen hasia den Liburu Azokaren baitan, atzo eta gaur ekitaldi sorta egin dira eta segituko dute, arreta deituz efemerideari buruz. Besteak beste, ohorezko aurreskuak dantzatu dira, Aitor Alava dantzari, Arrecifesko txistulariak lagun, gaiari buruzko dokumental bat eman da eta Xabier Olaizolak FEVAren eskariz idatzitako 'Gernikatik 73 urtetara' izeneko izkribua irakurri da.

Bere aldetik, Mar del Platako Denak Bat Euskal Etxeak programa oso bat antolatu du, larunbatean hasita eta gaur egunean segituta. Egitaraua artikulu honen ilustragarri dagoen irudian irakur daiteke, handiagoan hemen klik eginez.

(artikulu honen gaztelaniazko bertsioan, Diasporako hiru pertsonak erdaraz bidali dizkiguten hiru idazki daude, Gernikako bondardaketaren harira)