euskalkultura.eus

Miami, Estatu Batuak. Garrantzitsuena euskara ikasi edo hobetu nahi izatea da. Denbora ere, gehiago ala gutxiago, harrapatuko duzu handik edo hemendik. Izan ere erosoa eta malgua baita: internet bidez, tarteak zure tarte libreak izan daitezke, sortu ahala, eguneko edo gaueko edozein ordutan, edo asteko edozein egunean direlarik ere. Irakasle bat ere baduzu, zeurea, noiznahi zalantzak galdetu edo kontsultak egiteko prest, hau ere internet bidez edo telefonoz, Euskal Herrian zein Estatu Batuetan.

Ez aukera galdu. Gurari, borondate edo nahikeria hori baduzu --euskara ikasi edo hobetzekoa--, tresnak, metodoak eta erraztasunak Miamiko Euskal Etxeak ipiniko dizkizu [kontuz, orain Miamiko kasuari buruz ari gara, baina adibide honek Estatu Batuetako beste tokietarako eta munduko ia edozein tokitarako balio baitu].

Urte hasi berriko lehenengo saioa asteazken honetan, urtarrilaren 20ean izango da, Miamiko Euskal Etxean (4315 NW 7th Street), arratsaldeko zazpietan. Irakaslea, Aitzol Azurtza, oso pertsona atsegin eta eskuragarria da. Interesatuek aski dute bertara agertzea edo, igoal hobe, aldez aurretik Euskal Etxeko arduradunarekin (Boni, boniguenechea@hotmail.com) edo zuzenean irakaslearekin (Aitzol, aitzol@aol.com) harremanetan jartzea. Galdetzea libre da eta ez da loteslea.

Zeure galdera beste hiri edo estatu baterako bada, idatzi Izaskun Kortazar AEBetako koordinatzaileari (izaskunkortazar@gmail.com).