euskalkultura.eus

euskal diaspora eta kultura

Albisteak rss

Kontzertu hunkigarria eman du Maral-ek Buenos Airesko Iparraldeko Euskal Etxean Euskaltzaleak-en alde

2012/09/26

Maral taldea kontzertuan, Mariana Dominé kantaria buru (argazkia Euskaltzaleak)
Maral taldea kontzertuan, Mariana Dominé kantaria buru (argazkia Euskaltzaleak)

PUBLIZITATEA

Iragan asteburuan kontzertua eman zuen Maral talde euskal-argentinarrak Buenos Airesko Iparraldeko Euskal Etxeko frontoiean Euskaltzaleak euskaltegiaren alde. Irabaziak 1944tik Buenos Airesen bere izenari ohore eginez euskara irakasten duen elkarte honentzat izan zen. Euskaltzaleak-ek egoitza berria eskuratu zuen iaz, "Teila bat Argentinan euskararen alde" kanpainan bildutako dirua lagungarri. Kontzertu honekin Maralek, Iparraldeko Euskal Etxeak, eta bertara bildutako lagunek giro ederra sortu eta aldi berean elkartasunezko bultzada berri eta beroa eman diote kanpainari.

Buenos Aires, Argentina. Giro bikaina izan zen iragan irailaren 22an Maral taldeak Iparraldeko Euskal Etxean eman zuen kontzertuan: musika, euskal kantak, lagun asko eta euskal kulturari maitasuna nagusi izan ziren bertan. Buenos Aires hiriko euskaldun asko bildu ziren ekitaldira eta euren ekarpenek Euskaltzaleak euskaltegiaren lana sostengatzen lagunduko dute.

Maral taldeak, Mariana Dominé kantaria buru, euskal kanta herrikoien kontzertua eskaini zuen eta entzule askok eurekin bat egin zuten kantuan. Bertara bildu zirenen artean abestien letrak banatu zituzten Euskaltzaleak elkartekoek, eta horrela, kantuan aritzeaz gain, euskara ere praktikatu zuten entzuleek.

Concierto Maral 2012 (2)

[Itxura eder hau zuen Iparraldeko Euskal Etxearen frontoiak Maral taldearen kontzertuan (argazkia Euskaltzaleak)]

Concierto Maral 2012 (3)

[Euskaltzaleak-eko korukide eta partaideek ere euren hondar-alea ipini zioten gauari, zenbait kantu herrikoi eskainiz (argazkia Euskaltzaleak)]

Concierto Maral 2012 (4)

[Giro bikaina izan zuen kontzertuak, euskara eta euskal kantuak protagonista eta partaide, kantari inprobisatuen artean Euskaltzaleak-eko lehendakaria bera ere, Carlos Bordagaray, urdinez (argazkia Euskaltzaleak)]

Kontzertuaren atsedenean, festalariek euskal pintxo dastaketa egin zuten. Aukera zabala izan zuten: 'Onena' izeneko pintxoa (piperrak eta urdaiazpikoa), izokin mousse-a, onddo pintxoa, txaka pintxoa eta pintxoetan klasikoa dena, tortila pintxoa, besteak beste.

Concierto Maral 2012 (5)

[Tabernan pintxoak eta edariak zerbitzatu zituzten, Euskaltzaleak-eko lagunak paratzaile eta zerbitzari (argazkia Euskaltzaleak)]

Concierto Maral 2012 (6)

[Horrelako pintxoekin berreskuratu zituzten indarrak Maral-en kontzertuaz gozatu zuten festalariek (argazkia Euskaltzaleak)]

Jaiaren ostean argitaratutako ohar batean, Euskaltzaleak elkarteak esker ona agertu zuen, "Maral taldeari, Iparraldeko Euskal Etxeari, bildutako lagunei eta liluragarria den hainbeste jenderi eskerrik asko bihotz-bihotzez". 



« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia