euskalkultura.eus

euskal diaspora eta kultura

Albisteak rss

Iparraldeko Euskal Etxeak hitzaldi batekin eta Sorgin Afariarekin ospatu zuen San Juan gaua

2008/07/04

Mariana Arla, Carlos Martinez eta Norma Ríos, Iparraldeko Euskal Etxeko Sorgin Afariaren antolatzaileak
Mariana Arla, Carlos Martinez eta Norma Ríos, Iparraldeko Euskal Etxeko Sorgin Afariaren antolatzaileak

PUBLIZITATEA

Juan Carlos Ibarrola bazkideak eman zuen sorgin euskaldunei eta San Juan suari buruzko hitzaldiarekin hasi zituen Buenos Aireseko Iparraldeko Euskal Etxea gau magiko honen ospakizunak. Ekintzeekin jarraituz, joan den larunbat gauean, berrogei bat lagun elkartu ziren Sorgin Afarian. Urtero egiten den jai honetan ez zen girorik falta, mozorroak, dantzak, Akerraren irudiak eta denen artean egindako sutzarrari esker. María Elena Etcheverry, Cristina Cordara eta Mercedes Ariztegi jaiaren une nagusien protagonistak izan ziren.

Buenos Aires, Argentina. Ekainearen 18an hasi ziren Iparraldeko Euskal Etxean San Juan Gaueko ospakizunak. Lehenengo ekintza, sorgin euskaldunei eta San Juan suari buruzko hitzaldia izan zen, Juan Carlos Ibarrola Kultura Batzordeko kidearen esku.

Jarraitzeko, hurrengo larunbatean, berrogei bat lagun elkartu ziren euskal etxeko 'kintxoan' elkarteak urtero egiten duen Sorgin Afarian parte hartzeko gogotsu. Aretoa oihal more eta beltzez atondu zuten jairako eta ezohiko itxura honek zur eta lur utzi zituen bertaratu ziren beste euskal etxeetako hainbat gonbidatu. Arrakasta berezia izan zuen horman zintzilika ageri zen Aker erraldoi baten irudiak.

Sorgin Afaria Iparraldeko Euskal Etxean, Buenos Aires, 2

[Iparraldeko Euskal Etxea Sorgin Afarirako apainduta]

Afariak euskal menua izan zuen, Raúl Seeberrek prestatuta. Menua mota askotako pintxoak eta babarrunek osatzen zuten, nagusiki. Afarian zehar euskal abestiak entzun ziren, besteak beste, Agur Xiberua, Baratze bat, Hegoa eta Maitiak Galdegin zautan. 

Gauerdian, talde osoa patiora atera zen San Juan suaren usadioa betez garretara txotxak botatzera. Sutan urteko une eta oroitzapen txarrak erretzen zituzten bitartean partaideek gurari onak eskatu zituzten. Sugarren argitan,  Norma Riosek San Juan gauari buruzko testu hunkigarri bat irakurri zuen.

Sorgin Afaria Iparraldeko Euskal Etxean, Buenos Aires, 3
[Jaira bildu ziren lagunak Euskal Etxearen frontoian dantzan]

Urtero egiten den bezala, jaia dantzaldi batekin bukatu zen. Aitor Alava dantzariaren gidaritzapean, gonbidatu guztiek parte hartu dantzan eta aspaldiko sorginek egiten zuten moduan, dantza eman zuten gaua berandu arte.



« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia