euskalkultura.eus

Donostia-San Sebastián. Argentinako La Platako Maitena Etcheverryk irabazi zuen pasa den otsailean zozketatu genuen argazki kamera. Zozketako partaide bakoitzak Euskal Herriarekin edo euskal kulturarekin zerikusia zuten argazkiak bidali behar zizkigun, bost gehienez. Maitenaren argazkian, txistulari eta danbolindari hirukotea ageri da La Platako Moreno plazan, katedralaren parean, eta argazki horri esker lortu zuen Maitenak Canon argazki kamera digitala.

Oparia bidali genionean, bere buruaren argazkia egin zezala kamera berria eskutan eskatu genion eta, bere ama Maria Fernanda Astigarragaren bitartekaritza medio lortu dugu orain argazki hori guregana iristea. Izan ere, artikulu hau edertzen duen goiko argazki hori da.

Bestalde, oroituko duzuenez, urteko bigarren zozketa potoloko sariduna Caracaseko Beatriz de Elguezabal venezuelarra izan zen. Izena emanez jasotako mezu guztien artean egin genuen zozketa eta berak eskuratu zuen bi gaueko egonaldia aukeratutako Euskal Herriko nekazalturismo edo landetxean. 

Euskal Herrian familia bisitatzen (Bizkaian, Gipuzkoan zein Nafarroan) izana den arren, Bizkaia ondo ezagutzea gustatuko litzaiokeela aitortu digu Beatrizek, “nire aitaren familia guztia bizkaitarra baitzen”. Aita bilbotarra eta ama lizartarra ditu Beatrizek. “Amaren ahizpa baten senarra Lizarrako alkatea izan zen eta Gerra Zibilean odol hotzean erail zuten”.  Gurasoak Frantzian ezagutu zuten elkar, gerratik ihesi, eta ondoren Caracasera joan ziren, eta bertan jaio ziren bera eta bere hiru neba-arrebak.

"Familian guztia euskaldu sentitzen gara, naiz eta Venezuelako bigarren eta hirugarren belaunaldikoak izan". Beatrizek esan digunez, udazkenean etortzea gustatuko litzaioke, lagun edo lehengusu batekin, “baina guztia Venezuelako egoera politikoaren arabera beharko du izan”.