euskalkultura.eus

Frankfurt, Alemania. Frankfurtera datorren euskal ordezkaritzak (idazleak, editoreak eta Kultura saileko arduradunak) aurten ere Alemaniako Euskal Ikasketen Etxearen ongi etorri beroa jasoko du. Elkarteak, urtero bezala, azokan egiten diren euskal literaturari buruzko ekitaldietan parte hartuko du eta, are gehiago, hainbat ekitaldi berezi eta deigarri antolatu ditu. "Gutxienez bi egun, oso euskaldun izango ditugu hemen Frankfurten", azaldu dio EuskalKultura.com-i Martin Petrus elkarteko koordinatzaileak.

Hasteko, etzi asteazkenean, aurten Argentina ohorezko gonbidatu hartu duen 2010 Azoka hasiko den egunean, Petrus berak Harkaitz Canoren 'Pasaia Blues' eleberriaz azken hilabeteotan egiten aritu izan den irrati irakurketa bukatuko du. Liburua 2009 urtean argitaratu zen Alemanian, Petra Elsarrek itzulia, Pahl-Rugenstein argitaletxeko Zubiak euskal bilduman. Joan den abuztuan eta irailean Petrus eleberriaren kapituluak irakurtzen aritu da Radio X irratian, asteazkenero eguerdiko ordu batean. Etzi, irratsaioaren jarraitzaileek "Cesar Telleria ertzaina, Olatz eta Marta komandokideak eta Pasaian iraunbizitzen saiatzen diren beste pertsonaien istorioa nola bukatzen den jakingo dute", esan du Petrusek. 

Liburuak DJen ordez

Etzi ere, baina gauean, euskal eta kataluniar literaturari buruzko saio berezia eskainiko du RadioX-ek, 'Liburuak DJen ordez' lelopean. Besteak beste Edorta Jimenez idazleak parte hartuko du, irakurketa eta pasadizoekin, Euskal Herriko literatur arloko azken nobedadeen berri ematen. Hamaiketan hasi eta goizaldeko ordubiak arte luzatuko da saioa.

Biharamunean, urriaren 7an, Irati Jimenez eta Patxi Zubizarreta idazleek egungo euskal literaturari buruzko solasaldia egingo dute, euskaraz eta ingelesez 'Gaueko Hitzak' izenburupean. Euskal Editoreen Elkarteak antolatu du hitzaldia eta azokako 5.1 pabilioiako Clients Lounge aretoan izango da, 10:00tan. Horrez gain, urriaren 10era arte, euskal argitaletxeek euren nobedadeak aurkeztuko dituzte euskal standean.

Sagardotegia Frankfurten

Euskal ordezkaritzaren bisita lege onean bukatzeko euskal etxeak afaria antolatu du Buchwald jatetxean, alemaniar estiloko sagardotegi batean. Menua euskal eta alemaniar gastronomia nahasketa bat izango da. Literatur puntua Irati Jimenez, Edorta Jimenez eta Patxi Zubizarreta idazleek, Jörg Stier idazle eta sagardogile alemaniarrak eta Luxenburgeko idazle George Hausemer-ek jarriko dute. Informazio gehiago edo afarian izena emateko jo hona.

Bukatzeko, aipatu, Frankfurteko euskara ikasleek mintzapraktika saio bat egin ahal izango dutela M. Maiztegirekin asteazken eta ostegunean, euskal ekitaldien barruan.

-Azokaren webgunea: www.buchmesse.de/de/fbfm