euskalkultura.eus

euskal diaspora eta kultura

Albisteak rss

Frankfurteko Euskal Ikaskuntzen Etxearen hitzorduak: sukaldaritza ikastaroa eta Edorta Jimenezen mintzaldia

2007/04/25

Gamarrako Ostalaritza Eskolako bi irakaslek emango dute ikastaroa (argazkia Gamarrako Eskola)
Gamarrako Ostalaritza Eskolako bi irakaslek emango dute ikastaroa (argazkia Gamarrako Eskola)

PUBLIZITATEA

Frankfurteko Goethe unibertsitateko Euskal Ikaskuntzen Alemaniako Etxeak hainbat ekitaldi antolatu ditu datozen asteetarako. Lehendabizikoa gaur bertan izango da: euskal sukaldaritza ikastaro bat, Gamarrako Ostalaritza Eskolako bi irakasleek gidatuta. Bigarrena datorren maiatzaren bian izango da, Edorta Jimenez idazlearen eskutik. Jimenez Frankfurten izango da 'Kilkerren hotsa' bere liburuaren alemanierazko bertsioa aurkezteko. Liburu honekin euskal literaturari buruzko bilduma bat hasiko du Pahl-Ruhenstein argitaletxeak.
Gaur hasten den sukaldaritza ikastaroa Goethe Unibertsitateko Euskal Ikaskuntzen Alemaniako Etxeak antolatua da, Euskara eta Euskal Kultura ikastaroko ikasleek euskal gastronomia ezagutzeko aukera izan dezaten. 'Sukaldaritza oso garrantzitsua da Euskal Herrian eta aspalditik horrelako zerbait egiteko asmoarekin ibili gara. Euskal kultura ikastaroak jarraitzen dituzten ikasleek euskal gastronomia dastatzeko gogo bizia zuten', azaldu dio BasqueHeritage.com-i Martin Petrusek, Euskal Ikaskuntzen Alemaniako Etxeko ekintza kulturalen koordinatzaileak. Ikastaroa Mainz hirian izango da, Frankfurten izan ordez, bertan aurkitu dutelako antolatzaileek ikasle taldea hartuko duen sukaldea. 'Kontaktu pertsonalei esker eta sukaldatritza modan jarri delako Alemanian, horrexegatik lortu dugu ikastaroa egiteko lokala', esan digu Petrusek. 'Ea horrela jendea animatu eta egunen batean euskal jakiak prestatzen dituen taberna edo jatetxea irekitzen duten Frankfurten', gaineratzen du.

Juan Antonio Serrano Aguilar eta Xabier Sagarzazu Elizalde izango dira ikastaroko irakasleak. Gamarrako Ostalaritza Eskolako irakasleak dira biak eta Alemaniako ikasle taldeari euskal pintxoak egiten erakutsiko diete. 'Gamarrako Ostalaritza Eskolako kideak sarri joaten dira atzerrira euskal sukaldaritzaren maila erakustera. Hego Ameriketan eta Europako herrialde askotan egonak dira, euskal etxeetan eta beste zentroetan ikastaroak ematen. Argentinan, adinidez, 80 lagunek osatutako taldeentzako pintxoak egiteko ikastaroak eman izan dituzte', aurreratzen du Petrusek.

Ikastaroa Gernikako bonbardaketaren 70 urteurrenaren bezperan denez Euskal Ikaskuntzen Alemaniako Etxeak herri bizkaitarrean hildakoen oroimenean ekitaldi xume bat egingo du, minutu bateko isilunea gordez 'duela 70 urte gernikan izan ziren bonbardaketa lazgarriak gogoratzeko'. Ekitaldia oso esanguratsua da Alemaniako euskaltzale talde honentzat, Petrusek azaltzen duenez. 'Alemaniar, euskaldun eta euskaldunberri taldea gara gu, herrialde askotako ikasleak biltzen dituena kultur aniztasun gehien duen Alemaniako hirian. Guretzako oso garrantzitsua da guda garaietako samina eta hondamena goratu eta sekula ez ahaztea'.

Edorta Jimenezen mintzaldia

Astebete beranduago, maiatzaren 2an, Euskal Ikaskuntzen Alemaniako Etxeak gonbidatuta, Edorta Jimenez idazle mundakarra Frankfurteko Café Exzess aretoan (Leipziger Str. 91) izango da. Jimenezek Kilkerren Hotsa bere liburuaren alemanierazko itzulpena aurkeztuko du. 'Liburu honetan bere oroitzapenak eta bere gurasoek guda zibilari buruz kontatu zizkioten istorioak biltzen ditu Jimenezek', aipatzen du Petrusek. Liburua joan den urrian aurkeztu zuten Frankfurteko Liburu Azokan, Der Lärm der Grillen izenburuarekin. [Ezkerreko irudian Edorta Jimenez idazle mundakarra]

Pahl-Ruhenstein etxeak argitaratu du liburua eta euskal literatura bilduma bateko lehen alea izango da. Bilduma honekin argitaletxeak alemaniar irakurleen jakinmina piztu nahi du, euskal literatura garaikidea 'erabat lehiakorra' dela uste dutelako. 'Garrantzitsuena itzulpena euskaratik zuzenean egitea da, gaztelera zubi bezala erabili gabe. Itzulpen zuzenak beti dauka kalitate hobeagoa eta badira urte batzuk itzultzaile talde oso dugula', agertu du Arnold Bruns-ek, bildumako arduradun eta Pahl-Rugenstein argitaletxeko editoreak.


Lotura interesgarriak

Euskal Liburutegia, Frankfurt
http://titus.uni-frankfurt.de/basklib

Euskal Zinemaldia bukatu da Frankfurteko unibertsitean
EuskalKultura.com-en argitaratua 2007 otsailaren 8an


« aurrekoa
hurrengoa »

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia