euskalkultura.eus

Laprida, Argentina. Maria Larrazaren koroatzea joan den larunbateko gaueko hamarretan egin zen, Lagunen Etxeko egoitzan. Erregin hautatu berriaren tasunak goraipatu ostean, eta euskal dantzei eskaintzen dien ahalegin eta lana laudaturik, Euskal Etxeak bere koroatu berria erregin gisa identifikatzen duten ezaugarri eta jazki-tramankuluak eman zizkion Maria Larrazari.

Erregin gisa identifikatzen duen xingola Eduardo Torry batzordekide ordezkoak ipini zion; kapa, berriz, Tomas Barrena EEko lehendakariordeak; makila, Omar Moura batzordekide titular lehenak; lore sorta, Gustavo Provitina zinema adituak eman zion, izan ere larunbat arratsalde horretan bertan zine-forum saioa egina zuen Euskal Etxeak; eta, azkenik, erregin koroa bere aita Edgardo Larrazak, EEko kontu ikuskatzaile titularra denak ezarri zion.

Lagunen Etxe-ko Kultura koordinatzaile den Maria Ester Arrondok EuskalKultura.com-i argitu dionez, Euskal Etxea bere 20. urteurrena ospatzen ari den urteko erregina irailaren 16ean aurkeztuko dute Lapridako gizartearen aurrean, egun horretan, Laprida partido edo barruti gisa sortu zeneko 120. urteurrena ospatzeko ekitaldiak eta kabalkada egingo baitira.