euskalkultura.eus

Montreal, Québec. Euskaldunak, Quebec-eko euskal etxeak, jarduerei ekin die berriz, irailarekin batera, eta aurten eskainiko dituzten ikastaroen berri eman du. Euskara eskoletan aurrerapauso handia egin du elkarteak, eta hasi berria den ikasturtean bost irakasle izango ditu. Horrez gain, dantza eta mus ikastaroak ere hasi ditu. Halaber, euskal etxeak ikasturtean zehar hainbat egitasmo burutzeko asmoa agertu du: euskal kulturari buruzko hitzaldiak, ospakizun tradizionalak...

Bestalde, aste honetan elkarteko ordezkaritza bat New Yorken izango da, hiri estatubatuarreko euskal etxearen Mendeurreneko ospakizunetan parte hartzeko. "Horrek bide emango digu, batetik, euskal festetako giroan buru belarri sartzeko, eta, bestetik, Estatu Batuetako ekialdeko euskal etxeekin loturak estutzeko", agertu dute euskal etxeko iturriek.

Traineruarekin arraunketan

Edonola ere, uda ere zinez bizia izan da elkartean. Ekainean Indianoak espedizioaren traineruak Saint Laurent ibaian gora egin zuen, Ile aux Basque-etik Trois Pistoles-era; 500 km 12 etapatan. Euskal etxeak parte hartu zuen bidaian, ibilbideko herrietan euskal kultura ezagutzera emateko asmoz. Arratsaldero, etapetako bakoitzaren ostean, euskaldunak eta bertaratutako quebectarrak elkartu egin ziren, eta kultura bateko eta besteko festak eta janariak izan zituzten gozagarri; izan ere, bidaldi horretan, baziren abeslariak eta sukaldariak.

[Etapa osteko festa batean, Indianoak espedizioko kideak kantari (argazkia QuebecEE)]