euskalkultura.eus

Montreal, Québec. Jakinmin handia piztu zuen iragan urriaren 25ean Robert Grenier arkeologoaren hitzaldiak eta elkarteko kideak gogotsu bildu ziren Euskaldunak-eko egoitzara. Elkarteak euskal baleazaleek Ipar Ameriketako kostaldean utzi zuten aztarna aukeratu zuen eguneko ardatz gisa. Gaia puri-purian dago Euskaldunak-eko bazkideen artean; izan ere, datorren ekainean Indianoak 2013 izeneko espedizioan parte hartuko du euskal etxeak. Lapurdiko Ibaialdi elkarteak sustatzen duen abenturan euskal arraunlari talde batek Kanadako Saint Laurent ibaian gaindi bidaia egingo du, aspaldiko baleazaleen ildoari jarraituz.

Euskaldunak-en gaualdia "Apaizac Obeto" dokumentalaren emanaldiarekin hasi zen. Dokumentala 2006ean grabatu zen, euskal arraunlari talde batek Labrador kostaldean egin zuen bidaian. Espedizioak XVI. mendeko euskal baleazaleen txalupen erreplika bat erabili zuen eta Quebec eta Labradorreko kostaldean barrena 2.000 kilometro egin zituen 41 egunetan. Dokumentaleko irudi ikusgarriek euskal etxeko kideak liluratu egin zituzten emanaldian.

Euskal ontzien arrastoak

Ondotik, hitzaldia eman zuen Robert Grenier arkeologoak. Grenier ur-azpiko arkeologian aditua da eta 1978an euskal ontzi hondoratu bat aurkitu zuen Red Bay badian. Ontzia euskaldunek XVI mendean bale arrantzan erabilitakoa zen. Grenierrek bale arrantzaren historiari buruzko xehetasun ugari azaldu zituen eta hitzaldia oso interesgarria izan zen, elkarteko presidente Adelaide Daraspek Euskalkultura.com-i azaldu dionez.

[Elkarteko presidenteorde Ernest Behaxateguy (beltzez) Robert Grenier arkeologoa agurtzen (argazkia QuebecEE)]

Ekitaldian Montrealeko Udaleko ordezkari bat ere izan zen. Hitzaldiaren ostean, euskal etxeko kideek eta bisitariek euskal jaki dastaketa egin zuten.

-Indianoak proiektuaz informazio gehiago www.indianoak.fr webgunean