Haur eta nagusientzako eskulan tailer batekin hasi zituen Inauteriak Quebec-eko Euskaldunak elkarteak

2012/02/24

Quebec-eko Euskaldunak-eko kideak elkarteak antolaturiko Inauteri jaiaz gozatzen (argazkia EuskaldunakEE)

PUBLIZITATEA

Inauterietako euskal ohiturak eta mozorroak Quebec-eraino heldu dira aurten, Euskaldunak elkarteari esker. Iragan otsailaren 11n Quebec-eko euskal komunitateak Aratusteak ospatzeko jaia egin zuen Montrealeko egoitzan eta eguneko argazki sorta bidali diote EuskalKultura.com-i, gure irakurleekin partekatzeko. Elkarteak haur eta helduentzako eskulan tailer batekin hasi zuen gaualdia eta mozorroak eta txanoak egin zituzten parte hartzaileek. Ondoren, Euskal Herriko inauteriei buruzko hitzaldia eman zuen Adelaide Daraspek, elkarteko presidenteak.

Montreal, Quebec. Quebec-eko Euskaldunak elkarteak Inauteriak ospatu zituen iragan otsailaren 11n eta jai berezia antolatu zuen euskal etxearen egoitzan. Hogeita hamar bat bazkide bildu ziren bertara eta arratsaldeko bostak goiti, helduek zein haurrek eskulan tailer batean hartu zuten parte. Tailerraren gaia, jakina, Aratusteak izan ziren eta mozorroak eta euskal inauteri txanoak egin zituzten.

[Eskulan tailerrean Inauterietarako mozorroak egin zituzten Quebec-eko Euskaldunak elkarteko kideek (argazkia EuskaldunakEE)]

Ondoren afari legea pasa zuten elkarteko bazkideek, ongi pasa ere, izan ere garai honetako jaki tipiko bat prestatuz: mahatamiak. Iparraldeko zenbait herritan ohitura da Inauteri eskean datozen lagunei opil bero hauek eskaintzea, eta Ernest Behaxateguy bazkideak mahatamiak nola prestatu erakutsi zuen, era ikusgarrian erakutsi ere, argazkiak islatzen duenez.

[Ernest Behaxateguy bazkideak, sukaldaritza kontutan fin dabilela erakutsi zuen jaian mahatamiak prestatzen (argazkia EuskaldunakEE)]

Indarrak bildu ostean, elkarteko kideek Euskal Herriko Inauteriei buruzko hitzaldia entzun zuten. Hizlaria Adelaide Daraspe, elkarteko presidentea bera izan zen. "Oso polita izan zen eguna eta haurrei dedikaturiko ekitaldiak egiten segituko dugu, bizia eta kolorea emaiten baitiote euskal etxeari", aitortu digu Daraspek.

-Euskaldunak elkartearen webgunea, hemen