euskalkultura.eus

Misiones, Argentina. Kultura ekitaldi bat burutuko da gaur arratsaldean Posadaseko Liburutegian eta bertako Euskal Jatorri euskal etxearen eskutik, Fabio Echarri irakasle chakotarrak Eusebio Zamacola Abrisqueta. Un bandolero vasco en el Chaco (Eusebio Zamacola Abrisqueta, euskal bidelapur bat Chacon) bere liburua aurkeztuko baitu erakundeko Auditoriumean.

Echarri berak adierazten duenez, “1924. urtean Argentinara iritsi zen Eusebio Zamacola Abrisqueta euskaldunaren istorioa kontatzen du liburuak. Izpiritu abenturazaleak bultzaturik eta Primo de Riveraren jazarpen politikotik ihesean, Chacon kokatu zen 1930an Zamacola eta ‘Mate Cosido’ goitizeneko bidelapurrarekin ebasketa anitz egin zituen, bere izena eta irudia mitoen esparrura bihurtuz”. Aipatzekoa da liburuak 2010eko Andres de Irujo Saria jaso zuela eta Euskal Gizataldeen 5. Mundu-Batzarrean aurkeztu zuela egileak.

Fabio Echarri Chacoko Kotoiaren Lurra euskal etxeko lehendakaria da eta ‘Arturo Campion' Euskal Abertzaletasuna eta Kulturaren Ikasketa Guneko partaidea.

FEVAren kultur eskaintza

Gonbitearekin batera Mesopotamia argentinarreko euskal etxetik jakinarazi digute abuztuaren 30ean ‘Semeak ahantzi nahi duena bilobak gogoratu nahi du’ izenburuko genealogiari buruzko hitzaldia eman zuela Laura Nobilek herriko Liburutegian. Ekintza FEVAren babesarekin gauzatu zen eta oso harrera ona lortu zuen komunitatean.

[FEVAren izenean, Laura Nobilek bere hitzaldia eman zuen Posadasen (argazkiaEE)]

“Oso interesgarria egin zitzaien mintzaldia bildutako lagunei. Lauraren karismak eta azaltzeko argitasunak animatu dute jendea, euren euskal sustraiak biltzen hasi eta jarraitzeko”, adierazi dute euskal etxekoek.