euskalkultura.eus

La Plata, Argentina. Iaz paregabe ateratako esperientziak bultzaturik, aurten ere antolatu du Dantzarien Topaketa Buenos Aires hiriburuko euskal etxeko Zuzendaritza Batzordeak. Xedea -- "dantzari izan direnak betirako dira dantzari" ideiari jarraiki --, garai guztietako dantza taldeetako kideak biltzea izan zen, berriro elkartzeko, kontaktua ez galtzeko eta, nahi izanez gero, "abarkak jantzi eta pistara berriro ateratzeko", zergatik ez.

Horrekin batera, aurtengo topaketak gau berean Iñaki Deuna ospatzeko deia ere ekarri zuen. Kari horretara proiektatu ziren afalostean bideoz euskal etxeko dantzari ohien agurrak eta Iñaki izenekoenak. Zuzeneko musika ere egon zen. Etxeko abesbatzak, Evangelina Bertola zuzendari, euskal abesti batzuk interpretatu zituen, ‘Kanta gurekin’, ‘Nerea izango zen’, ‘Txakolin’, eta ‘Ai, ai, ai mutilak’, besteak beste.

[Dantza eta musika emankizunek alaitu zuten gaua (argazkiak EE)] 

Ikuskizunarekin jarraitzeko, dantzariek bereganatu zuten agertokia euren koreografiak aurkeztuz: ertainen taldeak ‘Makil dantza’ dantzatu zuen eta Zaharrak taldeak, ‘Jauzi’. Baina erakutsi ez ezik, irakatsi ere egin zuten Euzko Etxea-ko dantzariek eta erromeria osoan zehar animatu zuten publikoa pauso berriak ikastera.

Topaketaren baitan Euskal Herrian bizi den Pablo Fausto pilotari argentinarrak ‘Pala’ izenburuko liburua eskuratu zion euskal etxeko lehendakaria den Javier Clua-ri. Jesus Azurmendiren liburuak euskal kirol honi buruzko informazio interesgarria biltzen du eta hemendik aurrera Euzko Etxea-ko Matxin Burdin liburutegian ere kontsultatu ahal izango da.

Festaren antolatzaileek azpimarratu diote EuskalKultura.com-i euskal etxeko Hockey Taldeko neskengandik jasotako laguntza. “Afariko menu ederraz gozatu ondoren, nesken gurasoek prestatutako tartak eskaini genizkien gonbidatu guztiei. Eta neskek berek lagundu ziguten zerbitzatzen. Horren ostean berandu arte geratu ginen dantza egiten eta ondo pasatzen”, laburbildu dute.