Idahoko Boise State Unibertsitateko Euskal Ikasketa Programa NABOko kide berri onartu dute

2012/10/15

Nere Lete irakaslea Boiseko Basque Museum-a bisitatzen 'Introduction to Basque Culture' klaseko ikasleekin, 2011n (argazkia BSU))

PUBLIZITATEA

Ipar Ameriketako euskal etxeen federazioak (NABOk) elkarteko kide izendatu zuen Boiseko Estatu Unibertsitateko (BSU) Basque Studies Program egitasmoa, iragan urriaren 6ean Mountain Home-en egin zen bileran. BSUko Euskal Ikasketa Programa jakintza-alor anitzeko zentro bat da eta bere helburua unibertsitateko ikasleei Euskal Herriaren historia, hizkuntza eta kultura ezagutaraztea da. Programa honen bitartez ikasleek Euskal Ikasgaietan 'Minor' (hautazko ikastaroa) egin dezakete edo urtean zehar egiten diren ikastaro eta lantegitan parte hartu.

Boise, AEB. Boise State University-ko Basque Studies Program ikasketa zentroa NABOren kide bezala onartu zuten Ipar Amerikako euskal etxeen federazioko kideek iragan urriaren 6ean Mountain Home herrian egin zen bilkuran. Zentro honek euskal kultura, hizkuntza, historia eta erronka politikoak ezagutaraztea eta zabaltzea du helburu eta horretarako Idaho estatuko euskal komunitate handiaren sostengu garrantzitsua du. Euskal Ikasketa Programak lankidetza estua du Cenarrusa Foundation for Basque Culture elkartearekin. Idahoko Estatu Idazkari izan zen Pete Cenarrusa bizkaitarrak sortu zuen 2003an fundazio hau.

BSUko Basque Studies Program zentroak Euskal Ikasgaietan diplomatura egiteko aukera ematen du. Diplomatura hori egiteko ikasleek Oinarrizko Euskara I eta II ikasgaiak egin behar dituzte, eta hautazko bat aukeratu zentroak eskaintzen dituen 23 ikasgaien artean. Gaiak askotarikoak dira: Euskara Aurreratua, Euskal Dantza, Politika, Kultura, Artea Euskal Herrian, Literatura, Zinea, Euskal Emigrazioa AEBetara... (ikasgaien zerrenda, hemen). Euskal Ikasgaietan ziurtagiria ere eskura daiteke; horretarako aipatu ikasgai horien artean gutxienez hamar bete behar dira.

2012ko Udazkeneko ikasgaiak ematen dituzten irakasleen artean AEBetako euskal komunitateko kide ezagunak daude: Nere Lete, John Ysursa, Lisa Corcostegui, Xabier Irujo, Dave Lachiondo eta John Bieter, besteak beste.

Aurtengo Udazkeneko eta 2013 Udaberriko ikasgaien zerrenda, hemen.