Frankfurt eta Berlinen izango da aste honetan Txalamobila, munduan zehar ibili den txalaparta ibiltaria

2012/03/20

Triniak Txalamobilarekin, Frankfurtera egin zuten aurreko bisitan

PUBLIZITATEA

"Txalamobila" proiektuaren bitartez txalapartaren soinuak munduan zehar eraman nahi ditu 'Komando Trini' izeneko sortzaile eta musikari taldeak. Bihar bertan Frankfurten izango dira, Euskal Ikasketen Alemaniako Etxeak gonbidatuta, eta "Musikmesse Frankfurt" izeneko musikatresnen azokan parte hartuko dute. Horrez gain, txalapartari buruzko lantegi bat emango dute Institut für vergleichende Irrelevanz (IVI) ikastetxe alternatiboan. Igandean taldea Berlinera hurbilduko da eta hiriburu alemaniarreko kaleetan, Mauerpark eta Kreuzberg-en, joko du.

Frankfurt, Alemania. 'Komando Trini' taldea Frankfurtera itzuliko da bihar Txalamobil izeneko txalaparta ibiltariarekin. Artista eta sortzaile taldeak Musikmesse Frankfurt izeneko musikatresnen azokan hartuko du parte, Euskal Ikasketen Alemaniako Etxeak gonbidatuta.

Horrekin batera, musikari euskaldunek "Txalamobil lantegia" eskainiko dute Institut für Vergleichende Irrelevanz (IVI) institutuan. 2003an okupatutako etxe honetan kultur ekitaldi ugari egiten dira. Lantegi teoriko eta praktikoa eskainiko dute Trinitarrek eta, horrela, Txinan sortu zen proiektuaren berri emango dute; izan ere txalamobilaren ideia Beijingen sortu zen, txinatar bizikleta tipikoa eta txalaparta uztartuz.

Bestalde Trini Komandoak Irrati X irratsaioan parte hartuko du eta bere kideek azalpenak emango dituzte euskal tresnari buruz buruz eta Txalamobilaren proiektuaz. Irrati X Frankfurteko Goethe Unibertsitateko euskara ikasleek egiten duten irratsaioa da. Elkarrizketa hau datorren larunbatean entzun ahalko da, 12:00tatik aurrera, internet bidez (www.radiox.de).

Alemaniar bidaia bukatzeko taldea Berlinen izango da igandean, eta kale emanaldiak eskainiko ditu Mauerpark parkean (12:00tatik 14:00tara) eta Kreuzberg-en (15:00tatik 17:00tara).

-Txalamobil proiektuari buruzko informazio gehiago, hemen