euskalkultura.eus

Mar del Plata, Argentina. Urte berezia izan da 2010a Denak Bat Euskal Etxerentzat. Bigarren Mendeurreneko Euskal Astea antolatzea suertatu zitzaion eta ondo asko bete du eginkizun hori. Baina milaka euskaldun biltzen zituen jai honek ez zuen euskal etxeko kideen lan egiteko gogoa agortu. Izan ere, abenduaren lehenengo astean berriro bildu ziren Euskararen Nazioarteko Eguna eta urte amaiera ospatzeko.

Ekintzen programa 'Euskal Herriko Baserriak' erakusketarekin hasi zen abenduaren 2an, arratsaldez. Argazkiak ikusgai egon ziren egoitzako areto nagusian, eta erakusketa osatzeko, baserriei eta Euskal Herriko arkitekturari buruzko bibliografia zegoen eskura. “Erakusketak oso harrera ona izan zuen Mar del Platako lagunen arten, batez ere argazkien kalitateagatik”, azaldu diote Denak Bat-eko kideek EuskalKultura.com-i.

[Mar del Platako euskaltzaleek lorte sorta bat utzi zuten Gernikako Kimuaren ondoan]

Biharamunean, Euskararen Egunean, etxeko Batzordeko kideek, ikasle eta irakasleek, eta oro har hiriko euskaltzaleek lore sorta utzi zuten San Martin Plazan dagoen Gernikako kimuaren aurrean. Ondoren, euskal etxeko Luis de Ariztimuño Liburutegian, “Kimuak” bildumako film laburrak proiektatu ziren. 

 [Beste ekintza batzuen artean, Kimuak bildumako film laburrak proiektatu ziren]

Ospakizunekin bukatzeko, abenduaren 4an, larunbatean, urte amaierako afaria egin zen. Lagunen arteko afaria baino gehiago, Euskal Astearen antolakuntzan lagundu zuten pertsona guztiei merezitako eskerrak emateko topaketa izan zen. Beti Alai Dantza Taldeak alaitu zuen jaia bere koreografiekin. Txikiek, ertainek eta helduek, baita dantzari ohien talde batek ere, txalo zaparrada jaso zuten.

Dantzatzeaz gain, euskal etxeko txikienek sari bat jaso zuten. Euskal Asteko “Umeen Postalak” lehiaketa irabazi zutenez, umeei diploma bana eman zitzaien. Ondoren Olentzerok goxokiak banatu zituen euren artean. Amaitzeko euskara ikasle eta irakasleek Artaburu Euskaltzale Taldeak urtero argitaratzen duen Euskara Denontzat aldizkaria oparitu zieten gonbidatuei.