euskalkultura.eus

Folkestone, Ingalaterra. Folkestone-go hirurtekoaren bigarren edizio honek A million miles from home'(Etxetik milioi bat miliatara) izenburua izango du eta hiru hilabetez hemeretzi artisten lana erakutsiko du Ingalaterra hegoaldeko kostako herri honetan. Partehartzaileen artean, Cristina Iglesiasekin batera, Martin Creed --2001ko Turner saria--, Cornelia Parker eta Hew Locke bezalako lehen mailako artistak izango dira bertan.

Hirurtekoaren komisarioa den Andrea Schlieker-ek aurkezpenean azaldu zuen bere ustez hirurteko hau berezia egiten duena: artistek egiten dituzten interbentzioen helburua "gune publikoak eta hiriko paisaia herritar eta bisitarien topagune bihurtzea".

Iglesiasen interbentzioa Martello Tower izeneko eraikuntza batean egingo da. Martello-ak 1804an gerora sekula gauzatu ez zen Napoleonen balizko inbasio bati aurre egiteko Erresuma Batuko kostaldean eraiki zituzten adreiluzko dorre biribilak dira. Folkestone-n bisitariek dorreraino heltzeko bide malkartsua igo eta hara heldu aurretik brontzezko hosto faltsuez eginiko egitura aurkituko dute. Bertatik dorrea eta bere lubanarroa ikusi ahal izango dute, eta 'beste mundu baterako atarian' daudenaren irudipena jasoko dute, Schlieker-ek azaldu duenez.

Cristina Iglesias euskal eskultoreak nazioartean ibilbide luzea du. 1986ean eta 1993an Veneziako Biurtekoan parte hartu zuen eta, besteak beste, Madrilgo Pradoko Museoa handitzeko Rafael Moneok diseinatu zuen zabalkuntzako ate nagusiaren egilea da.