euskalkultura.eus

Chascomus, Argentina. Zingirako Euskaldunak Euskal Etxeak jarduerez jositako egitaraua aurkeztu du datozen egunetarako. Egiaz, gaur bertan hasten dira Chascomuseko euskaldunen hitzorduak, izan ere, Domingo Sarmiento Liburutegian euskal zinema emanaldia egingo da: Montxo Armendariz nafarraren "Secretos del corazón" luzemetraia izango da ikusgai (20:30tan).

Bihar euskal etxeak urteroko Euskal Jaia ospatuko du. Aurtengoa 22. edizioa da eta egitaraua goizeko 11:00tan hasiko da, pilota txapelketa batekin. Rio Cuartoko Gure Ametza elkarteko pilotariak eta Chascomuseko Pilota Eskolako gazteak lehiatuko dira. Arratsaldean, 19:00tan, meza egingo da katedralean eta gauean erromerian izango da Club Bochístico Independiente elkartean (Garay 77).

Hurrengo ekitaldiak

Jarduera hauek urriko programaren aperitiboa baino ez dira. Urriaren 8an Literatur Kafea ekitaldian parte hartuko du elkarteak eta Chascomuseko beste gizataldeekin batera poesia irakurraldi bat egingo du, euskal olerkiak aurkeztuz. Urriaren 10ean Euskal Sukaldaritza Ikastaroko azken klasea emango du euskal etxean Jose Boccardo sukaldariak, eta urriaren 11n Genero Indarkeriari buruzko Mahaiaren bilera hartuko du elkarteak. 

Urriaren 12tik 14ra, asteburuan, Zingirako Euskaldunak Chascomuseko Immigrantearen Jaiaren laugarren edizioan parte hartuko du. Ostiralean Casa de Casco-n euskal ondarearen erakusketa egingo da, larunbatean gizataldeetako erreginen desfilea eta Abesbatzen Topaketa izango dira, eta igandean dantza, musika eta gastronomia erakustaldiak egingo dira Immigranteen Pasealekuan.

Hegoamerikako casal kataluniarrekin

Bestalde, euskal etxeak iragan irailean egin zituen ekitaldien berri ere eman du. Hasteko, irailaren 13an euskal etxean bildu zen Genero Indarkeriari buruzko Mahaia. Hurrengo egunean, irailaren 14ean,  Hegoamerikako Casal Kataluniarren Topaketan izan zen La Platan. Antolatzaileek euskal elkartea gonbidatu egin zuten eta Pedro Mauregui presidentea bertan izan zen, Zingirako Euskaldunen ordezkari. Besteak beste, Katalunia eta Euskal Herriaren egungo egoera, independentzia eta autodeterminazio eskubidea izan ziren hizpide, Maureguik EuskalKultura.com-i azaldu dionez.

[Hegoamerikako Casal Kataluniarren Topaketa, La Platan (argazkia ChascomusEE)]

Horrez gain, irailaren 22an euskal etxeko Pilota Eskolako ordezkaritza bat Buenos Airesen izan zen, FEVAk antolatutako Pilota Lantegian parte hartzeko. Lantegia Laurak Bat elkartearen egoitzan egin zen. Chascomusetik Esku Pilota eskolako gazteak, Sebastian Errecart pilota arloko arduraduna eta Pedro Mauregui presidentea izan ziren bertan.

[Chascomuseko pilotariak FEVAren Pilota lantegiko saio batean (argazkia ChascomusEE)]

Azkenik, euskal etxeko bi muslarik irabazi zuten irailaren bukaeran Macachin-en jokatu zen "San Miguel de Aralar" Mus Txapelketa Irekia: Juan B. Mutuberriak eta Luis Morenok. Zorionak txapeldunei!