Canal Vasco Venezuela, Kolonbia eta Txileko 700.000 etxetara helduko da; Argentinan milioi batera ongi heltzeko

2010/11/23

Canal Vasco internet bidez ere ikus daiteke zuzenean

PUBLIZITATEA

Canal Vascok estaldura bikoiztu egingo du Venezuelan, Kolonbian eta Txilen, EITBko zuzendari nagusiak joan den ostiralean Telefonica enpresarekin Txileko Santiagon sinatu zuen akordioari esker. Telefonicak Canal Vascoren seinalea hobetu eta zabaldu egingo du eta herrialde hauetan 700.000 etxetan ikusi ahal izango da euskal katea. EITBko ordezkaritzak hainbat bilera izan zituen Argentinan ere, eta Patxi Arratibel EITBko Estrategia eta Kanpo Harremanetarako zuzendariaren hitzetan "Buenos Aires probintzian Canal Vasco ikusteko aukera zabalik dago".

Santiago, Txile. Alberto Surio EITBko zuzendari nagusia Hego Amerikan izan da azken egunotan, eta Canal Vasco katearen estaldura hobetu eta zabaltzeko hitzarmenak izenpetu ditu. Joan den ostiralean Telefonica enpresarekin sinatu zuen itunari esker, EITBren 'Canal Vasco' nazioarteko kanala Venezuelan, Kolonbian eta Txilen zabalduko dute. Canal Vascok egun duen estaldura bikoiztu eta 700.000 etxetara iritsiko da euskal diasporak garrantzi handia duen herrialde hauetan. Perun beste 700.000 etxetara iristen da dagoeneko seinalea.

Horrez gain, joan den astean Suriok zenbait bilera izan zituen Argentinako kable operadoreekin, herrialde horretan ere Canal Vasco katearen seinalea zabaltzekotan. Helburua, Canal Vasco Buenos Airesen ongi zabaldu ahal izatea. Argentinar probintzia honetan herrialde osoko biztanleen gehiengoa biltzen da eta Canal Vascoren zabalkuntza estrategian oso garrantzitsua izango litzateke. Bilerek ez dute emaitzarik eman oraindik, baina EITBko Estrategia eta Kanpo Harremanetarako zuzendaria den Patxi Arratibelen esanetan Buenos Airesen Canal Vasco ikusteko aukera "zabalik dago".

Mexiko, Argentina eta AEB 2011an

EITBk nazioartean zabaltzen jarraituko du 2011. urtean eta Mexiko, Argentina eta Ipar Amerikako Mendebalderako itunak lotzen saiatuko da. Alberto Suriok azaldu zuenez, "EITBren helburua ez da Euskadin bakarrik zerbitzu publikoa eskaintzea. Euskadiren errealitatea, irudia eta aktualitatea ere hurbildu nahi dugu euskal komunitateek presentzia handia duten lekuetara".

-Canal Vasco sintonizatzeko argibideak, hemen.
-Canal Vasco zuzenean internet bidez ikusteko, hemen.