Berri Txarrak taldeak 'Independent Music Award' sarietako bat irabazi du 'Folklore' kantuarekin

2011/07/22

Berri Txarrak talde nafarreko kideak

PUBLIZITATEA

Independent Music Awards lehiaketan Vox Populi saria jaso du Berri Txarrak taldeak, punk abesti onenaren atalean. Vox Populi sailean mundu osoko musikazaleak dira epaile eta eurek internet bidez emandako botoei esker jaso du 'Folklore' kantuak sari hau. Orotara, mundu osoko 57.000 bat zalek eman dute botoa lehiaketan, Berri Txarrak-ekoek euren webgunean azaldu dutenaren arabera. 'Folklore' kantua taldeak 2009an argitaratu zuen 'Payola' diskoan agertzen da.

Donostia-San Sebastian. Duela zenbait aste Berri Txarrak-en aldeko botoa emateko gonbitea egin genizuen EuskalKultura.com-en eta aukera horri eutsi eta hala egin zenutenon ahaleginak fruitua eman duela esan daiteke; izan ere, taldeak aurtengo Independent Music Awards lehiaketan Vox Populi saileko Punk kantu onenari saria eskuratu du. Zehazki, 'Payola' diskoko 'Folklore' kantuak jaso du saria.

Karia horretara, taldekideek eskerrak eman nahi dizkiete euren aldeko botoa eman duten zaleei, www.berritxarrak.net webgunean plazaratu duten mezuaren bitartez, eta bozketan "mundu osoko 57.000 entzule inguruk" parte hartu dutela azpimarratu dute. Aurtengo Independent Music Awards-eko epaimahai ofizialean Tom Waits, Suzanne Vega edo Ozzy Osbourne bezalako musikari sonatuak izan direla ere azpimarratu du talde nafarrak. "Eskerrik asko gure alde bozka eman duzuenoi, laster gara zuekin disko berria besapean", iragarri dute.

'Folklore' kantua taldeak Radio3 irratiarentzat egin zuen emanaldiaren bideo honetan: