euskalkultura.eus

Parana, Argentina.  2005. urtean hasi zuen Argentinako bira 'Euskal Aztarna - La Huella Vasca' erakusketak. Ibilbidean zehar 25 bat herritan egon da ikusgai Eusko Jaurlaritzak eta Argentinako Hezkuntza Ministerioak bultzatutako proposamena. Joan den urtean Urrundik euskal etxeko Antzerki Taldea erakusketa honen testuak miatzen hasi zen erakustaldia antzerki-lan bihurtzeko asmoarekin. Augusto Carballal zuzendariaren esku, proiektua gauzatu zen eta 2010ean 'Euskal Aztarna' Paranako eskualdeko eskola ugaritan antzeztu da.

Argumentuari dagokionez, Mireya Alcain, Silvia Barrios, Augusto Carballal, Marta Echague, Susana Schiavoni eta Horacio Zapata Soñez-ek osatutako antzezle-zerrendak, Argentinara heldu zirenean euskaldunek bizi izan zituzten gorabeherak jokatzen ditu. Urrundik elkarteko dantzariek ere hartzen dute parte ikuskizunean. Haiek dira antzerki lanari musika eta dantzak jartzen dizkiotenak.

['Euskal Aztarna - La Huella Vasca' uztailaren 1ean aurkeztu zen "Juan L. Ortiz" Kulturgunean (argazkia UrrundikEE)]

Sortu zenetik, emanaldi programa oparoa eskaini du Urrundik Antzerki taldeak, eta azken aurkezpena Paranako "Juan L. Ortiz" Kulturgunean izan zen joan den uztailaren 1ean. Arrakasta handia erdietsi zuen euskal immigranteen bizipenak kontatzen dituen lanak eta publikoak gogo biziz txalotu zituen artista guztiak. Herriko hedabideak ere bertaratu ziren antzokira eta egunkari nahiz telebista kateek horren berri eman zuten.

[Mireya Alcain, Silvia Barrios, Augusto Carballal, Marta Echague, Susana Schiavoni eta Horacio Zapata Soñez-ek osatzen dute antzezle-zerrenda (argazkia UrrundikEE)]

Lortutako arrakastak animaturik eta euskal kultura zabaltzen jarraitzeko asmoarekin, beste aurkezpen batzuk burutuko dituzte laster Urrundik-eko aktoreek . Abuztuan, berriro ere Paranan eta Nogoyan herrian ikusi ahal izango da Augusto Carballal-en 'Euskal Aztarna - La Huella Vasca'-ren bertsioa.