euskalkultura.eus

Rosario, Argentina. Oturuntza jendetsu batek ipini zion atzo igandez amaiera joan den astean zehar eta aurretik ere Rosarioko Zazpirak Bat Euskal Etxearen Mendeurrena ospatuz garatu den egitarau zabal bati. Bereziki azken ostiral, larunbat eta igandez garatutako ekitaldiek Argentina osoko hainbat jenderen bilgarri izan dira Rosarion, gehienbat Argentinako bazterretatik bilduak, baina baita ere auzoko Brasil eta Uruguaitik eta, nola ez, Europako Euskal Herritik ere, ordezkaritza artistiko eta politiko zabala iritsi baitzen Amalurretik, tartean Itxartu dantza talde getxoztarreko kideak, Urko, Naia Robles eta Natxo Knörr kantariak eta, alde politikoari dagokionez, Ibarretxe lehendakaria eta EAJ, Ezker Abertzalea, EA eta Aralarreko kideak, Independentistak sareko ordezkaritza batekin batera.

Igandeko bazkarira mila eta berrehun bat lagun bildu baziren, asteburuko ekitaldiek, bereziki jai-giro handiagoa zeukatenek ez ziren atzean gelditu. Ostiraleko eta larunbateko jaialdiek, El Circulo antzokian eginik, eta larunbat gaueko berbenak giro eta jende andana polita ekarri zuten. Larunbatean, berriz, nazio osotik helkdutako FEVAko ordezkariek euskal etxeen federazio argentinarraren Euskal Aste barneko ohiko bilkura egin zuten, baita ere dantza-taldeetako zuzendariek, Liburutegietako arduradunek, musikariek eta abarrek, baliatuz Euskal Asteak daukan erakarmena eta eskaintzen duen egokiera normalean elkarrengandik ehundaka edo milaka kilometrotara lanean ari direnak bildu eta elkarren ahalegin eta eskarmentuak azaldu, trukatu eta elkarganatzeko.

Sho Hagio eta, bihartik aurrera, irudi bidezko kronika

Bilkurak Japoniatik etorritako Sho Hagio Tokyoko Euskal Etxeko japoniar euskaldunaren presentzia ere bildu zuten, Uruguaiko zenbait euskal etxetako ordezkaritza zabal batekin eta Brasilgo Sao Pauloko beste batekin batera.

Urtero ohi duenez, EuskalKultura.com-ek Euskal Aste argentinarraren argazki eta irudi bidezko kronika bat argitaratuko du bihartik aurrera, aurtengo edizioak eman dituen une eta momentu gogoangarrienak nabarmenduz.