euskal diaspora eta kultura
2011/06/23
'Kontaketa harrigarriak' lehiaketaren III. edizioa gauzatu da aurten Misiones probintzia argentinarreko Corpus Christi-ko euskal etxearen eskutik. Herri askotako idazle eta ipuin anitz aurkeztu dira 2011ko deialdian “Atahualpa Yupanqui” liburutegiko Lagun Artean kultur taldeak antolatutako txapelketara, Argentinakoak eta baita kanpokoak ere. Armando Aravena (Txile) eta Mónica Ernestina (Loma Hermosa, Argentina) atera dira lehenengo eta bigarren garaile 'kontaketa harrigarriak' sailean; eta Silvia Graciela Franco (Castelar, Argentina) eta María del Carmen Escobar (Pergamino, Argentina) 'pertsonaia tipikoa' delakoan. Sari-emate ekitaldia uztailaren 10ean gauzatuko da.
2011/06/23
Gipuzkoako Foru Aldundiak euskal museo berri bat ireki du, sarean bakarrik aurki daitekeen museo zinez berezia. 'Gipuzkoa Geroztik' du izena eta 2.0 ekimenaren baitan sortua da. Museo honetako bisitari birtualek xaguari klik eginez ikusmira dezakete zentroa, bakoitzak nahi duen atala arakatuz eta edukiekin jolastuz. Erabilera interaktiboa sustatzen du museoak eta erabiltzaileek bertan erakutsiko diren altxorrak aukera ditzateke. Haurrek ere badute zer eginik, joko eta aproben bitartez Gipuzkoako ondarea ezagutzeko parada dute eta.
2011/06/22
Jaurlaritzako Justizia sailburu eta gobernuko eleduna den Idoia Mendia kazetariei zuzendu zitzaien atzo, astearteroko Gobernu Bileraren ondotik eta besteak beste jakinarazi zuen Jaurlaritzak onetsi egin zuela atzokoan hitzarmena AEBetako Idaho Estatuarekin, Euskadiko bulego bat zabaltzearren bertako Boise hiriburuan, eta haiek Bilbon. Jaurlaritzak New Yorken --Estatu Batuak, Kanada eta Mexikorako-- duen Ordezkaritzaren menpekoa izango da euskal jatorrizko komunitate adierazgarria biltzen duen Boise hirian ezarriko den bulego berria. Bestalde, Mendiak adierazi zuen epe "laburrean" izendatuko dutela Ipar-Ameriketako Euskadiko Ordezkaritzako burua, duela bi urte Lopez Lehendari izendatu zutenetik hutsik dagoena Ibarretxek izendatutako Aitor Sotes donostiarrak kargua utzi ostean.
2011/06/22
Aitzindaria izan zen Perpetua Saragueta mezkiriztarra (1905-1986): 1936ko gudaren aurretik Donostiako Argia eta Baionako Eskualduna aldizkarientzako kronikak idazten zituen euskaraz, Nafarroan gidatzeko baimena atera zuen bigarren emakumea izan omen zen eta garaiko emakumeei buruzko profilak idatzi zituen, euren lan ixil eta gogorra aintzat hartuz. Orain, Nafarroako Euskarabideak sustatzen duen Mendaur bildumak, Euskaltzaindiaren laguntzarekin, bere lanak osotasunean bildu ditu "Perpetua Saragueta: eskuidatziak eta hiztegia" liburuan.
2011/06/22
Iazko esperientzia arrakastatsuaren ondoren, aurten ere ospatuko da Euskadiko Turismo Hilabetea Buenos Aireseko Corrientes kalean dagoen La Plaza kulturgunean. Euskadi helmuga turistiko gisa bultzatzeko eta bide batez Euskal Autonomia Erkidego eta Argentinaren arteko loturak indartzeko asmoarekin, Elvira Kortajarena koktel-en anfitrioi eta Argentina, Brasil, Paraguai eta Uruguairako Euskadiko Ordezkari denak hasiera eman zion hilabete osoa iraungo duen ekitaldiari joan den ekainaren 16an, gizarte arlo askotako ordezkarien aurrean.
2011/06/21
5.930 metro ditu urriaren 2an Azpeitian egingo den Kilometroak jaiaren ibilbideak, eta antolatzaileek, bertara etorri ezin diren euskaltzaleak gogoan, sarean jarri dituzte, nahi duenak --birtualki bada ere-- bere metrotxoa egin dezan. Ekimenaren izena Klikmetroak da eta e-mailez, Facebook bidez edo Twitter kontutik har daiteke metroa. Doan gainera. Metro bakoitzarengatik zenbait babeslek dirulaguntza emango diote Ikasberri ikastolari, aurtengo antolatzaileari, alegia. Euskalkultura.com-ek 208. metroa hartu du; har ezazu zurea denak bukatu baino lehen!
2011/06/21
Datorren ekainaren 29an Montevideoko Centro Euskaro elkarteak ehun urte beteko ditu eta egitarau zabala antolatu du data esanguratsu hau ospatzeko. Mendean zehar gorabeherak izan ditu elkarteak, baina ehun urte bete eta ekinean jarraitzeak merezi du ospatzea eta horretan dihardute egunotan. Mendeurreneko ekitaldiak datorren astelehenean, ekainaren 27an, hasiko dira eta larunbata bitartean luzatuko dira. Hitzorduen artean, besteak beste, urteurrenari buruzko seilu baten aurkezpena eta Euskal Etxeen Nazioarteko Mus Txapelketa bat izango dira.
2011/06/21
Hanburgoko Cervantes Institutuak euskara ezagutzeko aukera eman zuen larunbatean, erakundeak egin zuen ate irekien egunean. Isabel Marin irakasleak gidatuta, euskara lantegi bat egin zen. Ordubeteko jardunaldia izan zen eta ikasleek elkarrizketa laburren bidez lehenengo urratsak egin zituzten euskararen arloan. Euskal hizkuntza hirian ezagutarazi ostean, Institutuaren asmoa ikastaro finkoa abiatzea da, horretarako nahikoa ikasle bilduz gero.
2011/06/21
'Basque' hitza daramaten Idahoko matrikula bereziek, jarraitu ahal izateko salmenta-helburuak ez dituzte bete eta idahotar gidarientzat aukera bat izateari utzi egingo diote uztailaren 1etik aurrera. Matrikulak euskal-amerikar komunitatearen ikur tradizionaletariko bat dakar barruan: karrokanpoa edo ardikarroa, aipatu 'Basque' berbarekin batera eta 2006 hasieratik zegoen eskuragarri. Matrikula berrien programek salmenta-kopuru minimorik ez du behar hiru urtez. Gero, salmentak (berriztapenak barruan) bi urtez jarraian mila unitatera ez badira heltzen Idahoko Trafiko-Departamentuak ahitutzat eman eta desagerrarazi egiten du.
2011/06/21
Bi gauza behar dira euskal etxe bati bizitza emateko: Euskal Herriko kulturarekiko maitasuna eta Euskal Herriaren maitaleak. Eta Saladilloko euskaldunek funtsezko bi ezaugarriok biltzen dituzte. Hori dela eta, egoitza propioa bukatzetik gero eta hurbilago daude; hori dela eta, komunitateari eskaintzen dizkioten proposamenak arrakastatsuak izaten dira. Lagun anitz hasi dira joan den astean euskara eskolak hartzen eta egoera bera espero da dantza klaseetan. Eta jendearen beste interes batzuei begiratzen dieten eskaintzak ere garatuko dira Itxaropen euskal etxean etorkizun hurbilean: Laura Nobile eta Elena Itcea FEVAko hizlarien emanaldiak eta Lagun Onak Abesbatzaren bisita.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
