euskal diaspora eta kultura
2011/08/03
Diasporaz beti esaten duguna errepikatuko dugu: gauza batzuk irakurri edota telebistaren distantziatik ikustea baino behar direla bertan bizi eta arnastu. Batzuetan hori posible ez denez, ahaleginak egin ditugu geure irakurleak ahalik eta gehien barneratu eta sar daitezen Buffaloko NABO 2011 euskal elkarretaratzeko giro eta festan. NABO 2011ko bigarren kronika honetara larunbatean egin zen kabalkada edo desfileko argazkiak eta, gehienbat, bideoak ekarri ditugu. Ea lortzen duzuen nolabait bertaratu eta hor bizi izan genuenaren partaide bilakatzea. Buffaloko NABO 2011ko bigarren kronika artikulua da hau.
2011/08/02
Joan den asteburu honetan egin du urteroko bere Ohiko Batzarra Buenos Aires probintzia argentinarreko Azul herrian, bertako Gure Txokoa Euskal Etxeak. Gai zerrendaren barruan Zuzendaritza Batzordea berritzea tokatzen zen, 2011-2012 eperako eta hauteskundeak eginik Jose Maria Iceta hautatu dute lehendakari berri. Batzordekide izango ditu berarekin, besteak beste, Eduardo Recalde, lehendariorde; Sonia Latasa, idazkari; Silvia Iceta, diruzain; eta Alfonso Dussio, idazkariorde.
2011/08/02
Bukatu berria da Trenque Lauquen hirian Argentinan Euskaraz programako 2011ko Neguko Barnetegia. Aste osoan zehar, hogeita hamar bat ikasle/irakaslek euren euskara hobetu eta erabiltzeko aukera paregabea izan dute HABE Institutuak, FEVA Federazioak eta Euskal Sustraiak euskal etxeak antolatutako ikastaro trinko honetan. “Erronka handia izan da guretzat kurtso honen antolakuntza gure gain hartzea, baina orain poz-pozik gaude oso esperientzia polita izan baita guztiontzat” adierazi du Hector Alberto Echaide euskal etxeko lehendakariak barnetegian parte hartu zutenei eskainitako agur bazkarian.
2011/08/01
Pixkana eta konturatu gabe Argentinako 2011ko Euskal Astearen datak gainera etorri zaizkigu eta hiru hilabete baino zertxobait gehiago baizik ez da gelditzen euskal-argentinarren urteko elkarretaratze nagusia abiatzeko. Azaroaren 7tik 13ra bitartean gauzatuko da aurten Euskal Argentinar Aste Nazionala, Necochean, eta antolatzaileak deia zabaldu diete herrialde osoko euskal dantza taldeetako zuzendariei, datorren larunbatean, abuztuaren 6an, bilera batera ager daitezen Necocheara, Euskal Astean zehar egingo diren dantza emanaldien xehetasunak koordinatzeko.
2011/08/01
"XX. mendearen lehenengo erdian milaka euskaldun abiatu zen Atlantikoaren bestaldera etorkizun hobe bila. Gerra Zibilaren aurretik askok egoera ekonomikoa hobetzeko asmoz emigratu zuten, eta gerraostean franquisten jazarkundetik ihes egin nahian. Euretako askoren gorabeherak ezagunak dira, gehienbat artzain edo negozio kontuetan ibili zirenena, baina izan baita ere zeluloidearen munduan murgildu zenik, hala nola Hollywood-en, zinearen industria handian. Batzuk, Henri D'Abbadie lapurtarrak bezala, mito handiekin lan egitea lortu zuten, Carles Chaplin-ekin-eta; beste batzuk ospea lortu zuten pantaila handitik pasa eta gero, eta hor aipa daitezke Juan de Landa mutrikuarra, Conchita Montenegro donostiarra edo Martine Carol ederra, Miarritzekoa bera". Deiak atzo argitara emandako artikulua, Iñaki Mendizabal sinatzaile.
2011/07/31
Idahoko estatuko Boise hiriburua, Estatu Batuetan, bere euskal jaiak ari da ospatzen asteburu honetan, urtero San Inaziori eskainiak, aurten San Balendin Berriotxoari lekua egin bazaio ere. Urteroko jaiak dira, uztailaren 31aren inguruan dira egiten, nahiz eta bost urtean behin jaiok bapatean hazi eta Jaialdi festa erraldoia bilakatzen diren. Euskaldunen festak, ordea, festa irekiak dira eta nahi duen orok har dezake parte. Izan ere, boisetar ez-euskaldun askok hala egiten dute. Euskal jaiak, bestaldem bere isla dauka bertako prentsa idatzian, irratietan eta telebistetan. Artikulu honetara, Boiseko telebista kate pare batean izaten ari diren isla ekarri nahi izan dugu.
2011/07/30
Batzuk urte osoan mintzo dute, baina joan den asteburuan, bertaratutako guztiak ziren 'euskaldun' Buffalon, euskaldunen festak jende guztia bildu eta bereganatu baitu Wyoming iparraldeko herriska honetan. Buffaloko kale nagusi luzea ezker-eskuin egon da ikurrinek edertuta, eta NABOk ostiralean eginiko Biltzar Nagusiak eta ondoren prestatutako euskal festa-programak euskaldun eta ez-euskaldunak ekarri ditu herriko parke eta agertokietara. Festaren ondotik, iruzkinek bat egin dute: "arrakastatsua oso", "bertan sekula egindako euskal festarik handiena eta ederrena"... San Frantziskotik eta Boisetik Buffalora lehenengoz etorritakoak ere loriatu dira, ez baitzuten espero halako komunitate txiki batean hain "euskal jai eta elkarretaratze gogoangarria" topatuko zutenik. [Hona Buffalo 2011ko irudi-kronika (I)]
2011/07/29
Eusko Jaurlaritzako Herri Ardularitzaren Euskal Erakundeak (IVAP) 2008-2009ko Kanpoko Ekintzaren Urtekaria argitaratu du eta bertan bi urte hauetan zehar arlo honetan egin diren ekimenak jasotzen dituzte Jose Luis de Castro eta Alexander Ugalde egileek. Beste zenbait gaien artean, urtekariak Patxi Lopez lehendakariaren gobernuak egin dituen aldaketak eta berrantolaketa aztertzen ditu.
2011/07/29
Kabia antzerki taldea pozik bueltatu da Miamiko Nazioarteko Antzerdi Jaialditik, izan ere kritika oso onak izan ditu 'Decir lluvia y que llueva' (Euria esan eta euria egin) bere antzezlanak. Uztailaren 14 eta 15ean aurkeztu zuten muntaia eta lehenengo emanaldian aretoa jendez lepo izan bazen, bigarrenean ikusle askok kalean gelditu behar izan zuten. Joseba Sarrionandiaren testuetan oinarritutako irudiekin jositako ikuskizunak jaialdi honetan izaten diren programatzaileen arreta ere deitu zuen. "Euskal Herrian baino gehiago kanpoan erakutsi dugu lana, horixe da gure paradoxa", aitortu dio EuskalKultura.com-i taldeko zuzendariak, Borja Ruizek.
2011/07/28
Argentina, Uruguai, Txile eta Brasileko 32 lagunek parte hartu dute aurtengo Euskara Munduan programaren neguko barnetegian (negua da Hego hemisferioan), Argentinako Trenque Lauquen hirian. Euskal etxeetako euskara irakasleak aritu dira ikasle barnetegian azken astebetean, eta ikastaro honekin talde honek lau urteko trebakuntza egitasmoa burutuko du. Programaren emaitza oso ona izaten ari da, arduradunen esanetan, eta ikasleek gainera, begibistan dituzte fruituak: lehenengo promozio hartan parte hartu zuten bi ikasle, Sabrina Otegui (EuskalKultura.com-eko Argentinako korrespontsala) eta Gabriel Arce, barnetegi honetan irakasle aritu dira.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
