Shanghai, Txina. Shanghaiko Euskal Etxeak aurtengo bere aurreneko Pintxo Potea egin zuen joan den ostiralean. "Eta oso ondo atera zen". Guztira 15 bat lagun bildu ziren EEko lehendakari Jon Zabalak berak prestatutako pintxoak dastatzera. Topaketa aitzaki bikaina izan zen jatorri askotako lagunekin biltzeko. Izan ere Shanghain bizi den euskal gazte profesional taldeska polita bildu zen, tartean gipuzkoarrak, bizkaitarrak eta nafarrak, baina pintxoek katalan, brasildar eta italiarren bat ere erakarri zuten, lagun eta bazkide txinatarrez gainera.
“Asmoa pintxo poteak hilero egitea da, hau lehen saiakera izan da eta oso ondo atera denez, eutsiko diogu”, adierazi dio EuskalKultura.eus-i Euskal Etxeko lehendakariak. “Gutxi gelditzen da uztailaren 7rako eta Euskal Etxearen ohiturari jarraituz, Sanferminak ere ospatuko ditugu –‘Shang Ferminak’ izenarekin–, eta ondoko hilabeetan Bazkide Eguna eta urte azkenean Santomas jaia”, iragarri digu Txinan sei urte daramatzan eta 2024 amaieratik EEko buru den bergararrak.
Maritxu Kajoi
Hauek urtero egiten dituzten elkarrateratzeak dira, baina hitzordu gehiago ere ari dira prestatzen. Txinako hiri handienean euskal kulturaren ikurra mantendu eta zabaltzea, eta euren lagun txinatarrak gonbidatzea, eta libertitzeko eta antolatzeko euskal moduak bertan ere praktikatzeko asmotan, Euskal Etxea hasia da urteko bigarren parteko topaketak planifikatzen, eta tartean, zalantzarik gabe, Shanghaiko euskal komunitatean tradizio handia duen ‘Maritxu Kajoi’ festa arrasatearra ere egongo da.
- Shanghaiko Euskal Etxea Instagramen, shanghaiko_euskal_etxea
Lagun bati bidali
Komentarioa gehitu
