euskalkultura.eus

Shanghai, Txina. Eragin handia izan du pandemiak baita Shanghaiko Euskal Etxean SEE ere eta, hala ere, edo agian, horregatik, gero eta garrantzi handiagoa hartu dute Elkarteak antolatzen dituen ekintzek bertan dauden euskaldunentzat. Horregatik bizkor jarraitzen dute Euskal Etxeko arduradunek, eta datorren hitzordua abenduaren 18rako iragarri dute, San Tomas ospatzeko. “Shanghain lortu dugun sagardo burbuiladun frantses batekin eta Txinan bertan egiten den txistorra moduko batekin ospatuko dugu”, adierazi dio EuskalKultura.eus-i Shanghaiko Euskal Etxetik Ikerrek.

Hau ez da izan azkenaldian Euskal Herriko ohiturak gogoan izateko SEEk antolatutako ekintza bakarra. Izan ere, joan den asteburuan ‘Tortilla Txapelketa’ egin zuten eta 25 bat lagun bildu ziren tortilak dastatu, ebaluatu eta saritzeko. “Hamalau bat tortilak hartu zuten parte. Bildu ginenen artean, batzuk Euskal Etxeko bazkideak dira eta beste batzuk bertako lagunak. Euskal Herriko jendea batik bat, baina baita Katalunia, Andaluzia eta Espainiako beste leku batzuetakoak ere. Irabazlea Martin gasteiztarra izan zen, nahiz eta Arabako patatak ez lortu”, azaldu du EEko erreferenteak.

Txapelketaz gain, aurten ‘Shang Ferminak’ eta ‘Maritxu Kajoi’ festa arrasatearra ere ospatu dituzte. Eta mendi txangoak ere egin. “Pandemia garaia bereziki gogorra egin zaigu, nahiz eta Txinan bertan bizitza ‘normala’ egin zitekeen”, azaltzen du Ikerrek. “Gutako asko ez gara bi urtetan bueltatu Euskal Herrira ezta Txinatik atera ere. Gogorra egiten da hainbeste denboran etxera bueltatu ez izana,” baitesten du.

“Eta hortxe Euskal Etxeak garrantzi berezia izan du. Bertan biltzea da Euskal Herrian egongo bagina bezala sentiarazteko moduetako bat, EEko ekintzen eta elkarretaratzeen bitartez da. Hala ere, gero eta kanpotar gutxiago dago Txinan, jendea badoa ezin duelako egoera honekin jarraitu, eta ez da jende berria etortzen, beraz ez da erraza”, hausnartzen du gazte ordiziarrak.

Shanghaiko Euskal Etxea Instagramen, shanghaiko_euskal_etxea